4 gündə İrandan Azərbaycana 42 kiloqramdan çox narkotik vasitə keçirilməsinin qarşısı alınıb

Bakı/06.11.23/Turan: Sərhəd Qoşunlarının "Horadiz" sərhəd dəstəsinin əməkdaşları tərəfindən 42 kiloqramdan çox narkotik vasitənin qaçaqmalçılıq yolu ilə Azərbaycana keçirilməsinin qarşısı alınıb.

Belə ki, noyabrın 1-də saat 14:40-da Zəngilan rayonunun Hacalı kəndi yaxınlığında yerləşən sərhəd zastavasının xidməti ərazisində 8 kiloqrama yaxın narkotik vasitə  -marixuana aşkar olunaraq götürülüb.  

Elə həmin tarixdə Füzuli rayonu Mahmudlu kəndi yaxınlığında yerləşən sərhəd zastavasının xidməti ərasizində Azərbaycan sərhədini pozan İran vətəndaşı saxlanılıb. 

Saxlanılan şəxsin üzərinə baxış zamanı ümumi çəkisi 31 kiloqram olan narkotik vasitə (3 kq metamfetamin, 28 kq marixuana,  0.50 qr tiryək) və narkotik tərkibli güclü təsiredici vasitə hesab edilən 2000 ədəd Metadon M-40, 600 ədəd Pregabalin-150 müxtəlif təyinatlı dərman preparatları aşkarlanıb. 

Noyabrın 4-də saat 10:55-də Füzuli rayonu Böyük Bəhmənli kəndi yaxınlığında yerləşən sərhəd zastavasının xidməti ərazisində qaçaqmalçılar tərəfindən gizlədilmiş 3 kiloqram narkotik vasitə - marixuana aşkar olunaraq götürülüb.

Faktlar üzrə əməliyyat-istintaq tədbirləri davam etdirilir. 0