Abid Qafarov sağalmadan xəstəxanadan cəzaçəkmə müəssisəsinə qaytarılıb - hüquq müdafiəçisi

Bakı/24.12.22/Turan: Ictimai fəal Abid Qafarov iki gün əvvəl klinik ölüm keçirməsinə baxmayaraq  Penitensiar Xidmətın Müalicə Müəssisəsindən 14 saylı cəzaçəkmə müəssisəsinə etap edilib.

Bu barədə Müdafiə xətti təşkilatının direktoru Rüfət səfərov bildirib.

Onun sözlərinə görə, dekabrın 24-də fəalın həyat yoldaşı Elnarə Qafarova 14 saylı CÇM-də şüşə arxasından Abid Qafarovla görüşüb.  Xanım bunları bildirib: “Abidin sifətinin sağ tərəfində hissiyyat yoxdur. Qulaqlarında səs-küy var. Başgicəllənmələri xeyli artıb.  Abid təkidlə tələb edir ki, Müalicə Müəssisəsinə qaytarılsın, normal həkim müayinəsi, tibbi təminat olsun. Təsəvvür edin ki, Müalicə Müəssisəsində qaldığı müddətdə hər hansı diaqnoz qoyulmayıb, sadəcə, deyiblər ki, yaxşısan. Ailəmiz bilmir nə etsin, necə etsin”.

* "Bakı Birlik" ictimai təşkilatının rəhbəri və "Kim.tv" YouTube kanalının aparıcısı Abid Qafarov iyulun 13-də bir qrup Qarabağ müharibəsi veteranının şikayəti ilə bir il azadlıqdan məhrumetmə cəzasına məhkum edilib.

Məhkəmə onu CM-in 147 (böhtan) və 148-ci (təhqir) maddələri ilə təqsirli bilib.

İddiaçılar - müharibə veteranları Qafarovun "itaətkar" olmamaq və özbaşınalığa müqavimət göstərmək çağırışını təhqir hesab ediblər.

Hüquq müdafiəçiləri hesab edirlər ki, Qafarovun həbsi "Tərtər İşi"ni, xüsusən təqsirsiz hərbi qulluqçuların həbsini və onlara işgəncə verilməsini tənqid edənlərin təqibi kampaniyasının davamıdır.-06В-