Adlı-sanlı idmançıların etirazı

Bakı/28.07.17/Turan: Gələn ay sərbəst və Yunan-Roma güləşi üzrə Dünya Çempionatı keçiriləcək. Ancaq Azərbaycan yığmasının güləşçiləri yarışa hazır deyil. Çünki əlaqəli qurumlardan olan Güləş Federasiyası hazırlıq üçün gərəkli şəraiti yaratmayıb. Bunu iyulun 28-də Azərbaycan Güləş Federasiyasının qarşısına toplaşıb etiraz edən güləşçilər bildiriblər.

Etiraz edən güləşçilər arasında tanınmış güləşçilər Toğrul Əsgərov, Yunan-Roma güləşi üzrə dünya çempionu Rəsul Cunayev, Hacı Əliyev və digərləri olub.

Narazı güləşçilərin bildirdiyinə görə, 12 aydan artıqdır ki, maaş almayıblar. Milli Olimpiya Komitəsi, Gənclər və İdman Nazirliyi kimi problemdən xəbərdar olsalar da gərəkli addımlar atılmır.

Sərbəst güləş üzrə milli komandanın üzvlərindən Hacı Əliyev Turan-a hazırlıq şəraitinin yaradılmamasından gileylənib. Onun sözlərinə görə, bəzi güləşçilər üçün bir ildən çoxdur ki, təlim toplantısı təşkil edilmir: "Gənc idmançıların məşqə gedib-gəlməyə imkanları yoxdur. Biz son olimpiya oyunlarında 9 medal qazanmışıq. Hazırda reallıq budur ki, ciddi problemlərlə üzləşmişik. Dünya Çempionatına isə çox az vaxt qalıb", - idmançı bildirib.

Güləşçilərdən Rəsul Çunayev da şəraitsizlikdən, bir ildən artıqdır ki, əmək haqqı, mükafat almamalarından, məşqçisiz, masajçısız qalmalarından bəhs edib.

İdmançılar üzləşdikləri problemlə bağlı iyulun 29-da mətbuat konfransı keçirəcəklər.

Gənclər və İdman Nazirliyindən güləşçilərin üzləşdiyi problemin çözümü ilə bağlı hər hansı bilgi verməyiblər. Nazirliyin mətbuat xidmətinin rəhbəri Səmayə Məmmədova Turan-a açıqlamasında güləşçilərin etirazından xəbərdar olduqlarını bildirib.

Onun sözlərinə görə, güləşçilər nazirlikdən deyil, Güləş Federasiyasından şikayət edirlər.

Azərbaycan Güləş Federasiyası isə güləşçilərin etirazını şərh etməyib.

Azərbaycan Güləş Federasiyası 1993-cü ildə təsis olunub. Federasiyanın prezidenti vergilər naziri Fazil Məmmədovdur.-05B-