ADNA-da terror aktının ildönümü ilə bağlı anım aksiyası

Bir sıra gənclər təşkilatları aprelin 30-da Neft Akademiyasında (ADNA) 2009-cu il aprelin 30-da törədilmiş kütləvi qətl qurbanlarının xatirəsini anım aksiyası keçirəcək.

Xatırladaq ki, həmin vaxt Gürcüstan sakini Fərda Qədirov ADNA binasına daxil olub, tapançadan atəş açaraq, 12 nəfəri qətlə yetirib və daha 13 nəfəri yaralayıb. Sonra Qədirov özünü güllələyib. Bu iş üzrə Qədirovun 4 həmyerlisi mühakimə olunub. Onlardan 3 nəfəri ömürlük, biri isə 11 il həbs cəzası alıb.

Lakin istintaq hələ də cinayətin motivlərini açıqlamayıb. Bir tərəfdən Qədirovun psixi cəhətdən xəstə olduğu, digər tərəfdən isə onu etnik erməni olan Gürcüstan vətəndaşı Mardun Qumaşyanın göndərdiyi iddia olunub.

Aksiyada Xalq Cəbhəsi, Vətəndaş Həmrəyliyi partiyalarının, NİDA, “Azad gənclik” hərəkatlarının gənc fəalları iştirak edəcək. 

Aksiyanın Cəfər Cabbarlı abidəsinin önündə başlaması və oradan ADNA-nın faciə baş verən korpusuna qədər yürüş keçirilməsi, qətlə yetirənlərin xatirəsinin bir dəqiqə sükutla yad edilməsi nəzərdə tutulur. Aksiya terrora qarşı etirazdır.

Bir qayda olaraq, hakimiyyət bu faciənin qurbanlarının xatirəsini anım tədbirləri həyata keçirməyə imkan vermir. -16D06-