Ağacları qanunsuz kəsən mütəşəkkil dəstə üzvləri saxlanılıb

Bakı/16.02.22/Turan: Daxili İşlər Nazirliyinin (DİN) Baş Mütəşəkkil Cinayətkarlıqla Mübarizə İdarəsinin, Ekologiya və Təbii Sərvətlər Nazirliyi Meşələrin İnkişafı Xidmətinin iştirakı ilə keşirilmiş əməliyyatda Astara və Lerik rayonları ərazisində meşələrdə ağacları qanunsuz olaraq kəsən mütəşəkkil dəstənin üvləri saxlanılıblar. Bu barədə DİN-in mətbuat xidmətindən bildirilib.

Məlumata görə, qeyd edilən ərazilərdə palıd və fıstıq ağaclarının kəsildiyi müəyyən edilib.

Əməliyyat nəticəsində mütəşəkkil dəstənin başçıları, Astara rayon sakinləri Sərdar Gənciyev və Sərhad Eynullayev, eləcə də dəstənin daha 6 üzvü həbs ediliblər.

Ekspertlərin rəyinə əsasən, dəstə üzvləri tərəfindən yaş halda kəsilən ağaclardan bəzilərinin yaşı 100-150 ildən çox olub.

Qeyd olunan faktla bağlı Baş İdarədə Cinayət Məcəlləsinin müvafiq maddələri ilə cinayət işi başlanılıb.

Hazırda ağacların kəsilməsində iştirak edən dəstənin digər üzvlərinin saxlanılması üçün əməliyyat-istintaq tədbirləri davam etdirilir. -05D-