Ağaəli Yahyayev Apellyasiya Məhkəməsinə polisdə məruz qaldığı işgəncələrdən danışıb

Bakı/06.09.23/Turan: "Müsəlman Birliyi" Hərəkatı İdarə Heyətinin üzvü, narkotik maddələrin qanunsuz dövriyyəsində ittiham olunan Ağaəli Yahyayev saxlanıldıqdan sonra polisdə işgəncəyə məruz qalıb. 

Müdafiə tərəfi diqqəti  fəalın işgəncə ilə bağlı Apellyasiya Məhkəməsinə müraciətinə yönəldib. 

Bununla əlaqədar apellyasiya şikayətinə baxılması sentyabrın 7-nə təxirə salınıb. Sentyabrın 6-da Yahyayevin bacısı Elnarə Eldar Kürdəxanı qəsəbəsindəki 1 saylı Bakı İstintaq Təcridxanasında qardaşı ilə görüşüb.

ElnarıəEldar Turan-a bildirib ki,  Yahyayev həbsdən sonra polisdə məruz qaldığı işgəncələrdən danışıb.  

Bacısının sözlərinə görə, Yahyayevi avqustun 31-də   Mehdiabad qəsəbəsində Daxili İşlər Nazirliyinin Baş Narkotiklərlə Mübarizə İdarəsinin əməkdaşları saxlayıblar və yerli polis bölməsinə aparıblar.  "Polkovnik rütbəli şəxs və digərləri 2 saata yaxın onu narkotik maddə saxlaması və satmasına dair maddəni boynuna götürməyi razı salmağa çalışıblar. Qardaşımın razı olmayacağını görüb ona işgəncə verməyə başlayıblar. Əllərini  bağlayaraq bədəninə yumruqla zərbələr endiriblər,  dəyənəklə ayağının altına vurublar. Bu zərbələrdən Ağaəlinin ayaqları şişib. İşgəncələrə baxmayaraq, Agaəli törətmədiyi cinayəti etiraf etməkdən imtina edib", - o deyib. 

Beysbol bitası ilə onu zorlayacaqları ilə hədələyiblər. Bundan sonra  törətmədiyi cinayəti etiraf etməyə məcbur olub. 

Elnarə Eldar deyib ki,  təcridxanada qardaşı kürəyindəki hematomanı ona göstərib. 

Sentyabrın 6-da Sumqayıt Apellyasiya Məhkəməsində Yahyayevin həbsilə bağlı şikayətə baxılıb. O özü  1 saylı Bakı İstintaq Təcridxanasından prosesdə on-line iştirak edib

Vəkil  Zibeydə Sadıqova iclasdan əvvəl on-line formada onunla söhbət edib. Yahyayev kürəyindəki hematomaları, dabanlarındakı zərbə yerlərini vəkilə göstərib.

Vəkil Turan-a bildirib ki, Yahyayevin bədən xəsarətləri istintaq təcridxanasına daxil olduğu zaman da qeydə alınıb.

Yahyayev vəkilə deyib ki, Abşeron Rayon Məhkəməsi onun barəsində həbs qətimkan tədbiri seçəndə hakimə işgəncə barədə məlumat verib və bədənindəki xəsarətləri göstərib, həmçinin vəkil kimi Sadıqovanın dəvət olunmasını xahiş edib.

Lakin Abşeron Məhkəməsi onun ifadəsini və xahişini nəzərə almayıb.

Prosesin video və audio-yazısının aparılmasına baxmayaraq, fəalın işgəncə barədə sözləri və seçim üzrə  vəkilin dəvət edilməsi xahişi protokolda əksini tapmayıb. 

Bununla əlaqədar vəkil Sadıqova Sumqayıt Apellyasiya Məhkəməsində Abşeron məhkəməsinin iclasının qeydlərinə baxılması və dinlənilməsi üçün vəsatət qaldırıb.

Lakin hakim Rəşadət Ağayev qeydləri vəkilin iştirakı olmadan araşdırmaq qərarına gəlib və dinləmələri sentyabrın 7-nə təxirə salıb.

Müdafiə tərəfi apellyasiya şikayətində Yahyayevin həbsdən azad edilməsini və cinayət təqibinə xitam verilməsini xahiş edir.

Bu mövqe ona əsaslanır ki, Yahyayev saxlanıldıqdan sonra ona ailəsilə əlaqə saxlamağa və seçdiyi vəkili dəvət etməyə icazə verilməyib. Bununla da onun müdafiə hüququ kobud şəkildə pozulub, vəkil Sadıqova qeyd edib. 

Bundan əlavə, etirafedici ifadə verməsi üçün ona işgəncə tətbiq edilib, yəni sübutlar qanunsuz yolla əldə edilib.

Müdafiə tərəfi həmçinin Apellyasiya Məhkəməsindən Yahyayevin işgəncədən  şikayətini araşdırmaq üçün prokurorluğa müraciət etməsini xahiş edib.

Daxili İşlər Nazirliyindən şərh almaq mümkün olmayıb. 

Yahyayev avqustun 31-də saxlanılıb. Ertəsi gün ona qarşı Cinayət Məcəlləsinin 234.4.3 maddəsilə (külli miqdarda narkotik maddənin qanunsuz dövriyyəsi) ittiham irəli sürülüb və məhkəmənin qərarı ilə barəsində həbs qətimkan tədbiri seçilib.

Ağaəli Yahyayevi 5 ildən 12 ilədək azadlıqdan məhrumolunma təhlükəsi gözləyir. 06В-