Ağdaşda 4 fəal siyasi məhbusların azad edilməsi tələbilə aclığa qoşulub

Bakı/13.01.23/Turan: Yanvarın 13-də Ağdaş rayonunda 4 yerli fəal Tofiq Yaqublu və Bəxtiyar Hacıyevin başladığı aclığa qoşulub.

Bunlar Azərbaycan Xalq Cəbhəsi Partiyası rayon təşkilatının üzvləri Qorxmaz Əbdürrəhimov, Məzahir Rəhimov, Rövşən Rəhimov və ictimai xadim Nüsrət Həsrətlidir.

 “Biz Tofiq Yaqublunun və bütün siyasi məhbusların azadlığa buraxılmasını tələb edirik”, - Azərbaycan Xalq Cəbhəsi Partiyası Ağdaş rayon təşkilatının bəyanatında deyilir.

Bununla, aclıq edənlərin ümumi sayı 18 nəfərə çatıb.

Tofiq Yaqublu xəstəxanada, Bəxtiyar Hacıyev istintaq təcridxanasında, 11 fəal Müsavat Partiyasının qərargahında, 4 nəfər Ağdaş rayonunda, Tofiq Yaqublunun xanımı isə öz evində aclıq edir.

Maya Yaqublu bildirib ki,  səhhətində ciddi problemlər olsa da, aksiyanı davam etdirməkdə əzmlidir. “Başımda və böyrəklərimdə şiddətli ağrılar var, təzyiqim kəskin şəkildə aşağı düşüb, daimi başgicəllənmə var. Bütün bunlara baxmayaraq, aksiyanı davam etdirəcəyəm. Əgər Tofiq ölərsə, mən də onunla öləcəm”, – Maya Yaqublu Turan agentliyinə bildirib.

Yanvarın 13-də tibb elmləri doktoru Adil Qeybulla Bakıdakı 6 saylı xəstəxanada Tofiq Yaqublunu ziyarət edib.

"Onun həyatı üçün təhlükə yoxdur, təzyiqi və nəbzi stabilləşib. Bir qədər arıqlayıb, huşu özündədir, danışa bilir. Biz çox danışdıq", - həkim deyib.

Azərbaycan Xalq Cəbhəsi Partiyasının fəalı, Müsavat Partiyasının qərargahında aclıq edən Babək Həsənov bildirib ki, yanvarın 12-də aksiya iştirakçıları tibbi müayinədən keçiblər. Bütün iştirakçılar yüksək və ya aşağı təzyiqə baxmayaraq aksiyanı davam etdirəcəklər. “Tələblərimiz yerinə yetirilənə qədər ac qalacağıq”, - o deyib.

*Xatırladaq ki,  dekabrın 23-də Tofiq Yaqublu hüquq müdafiəçisi Bəxtiyar Hacıyevin azadlığa buraxılması tələbilə Bakının mərkəzində keçirilən etiraz aksiyasında saxlanılıb. Həmin gün Səbail məhkəməsi onu xırda xuliqanlıq və polisə tabe olmamaq ittihamı ilə 30 sutka həbs edib. Yanvarın 5-də Bakı Apellyasiya Məhkəməsi bu qərarı qüvvədə saxlayıb. Yaqublu buna etiraz olaraq aclıq elan edib.

Dekabrın 9-da Xətai Rayon Məhkəməsi Bəxtiyar Hacıyevi xuliqanlıq və məhkəməyə hörmətsizlik ittihamı 1 ay 20 gün həbs edib.

Hacıyevin həbsi geniş tənqidlərə səbəb olub və “Müdafiə xətti” hüquq- müdafiə təşkilatının təşəbbüsü ilə dekabrın 23-də fəallar Tofiq Yaqublunun saxlanıldığı yerdə etiraz aksiyası keçiriblər.

Həbsdən sonra Bəxtiyar Hacıyev aclığa başlayıb. 14 gün aclıq edib. Onu əmin ediblər ki, hakimiyyət onu azad etməyə hazırdır və o, aksiyanı dayandırıb. Lakin yanvarın 9-da məhkəmə onu azadlığa buraxmayıb və fəal yenidən aclığa başlayıb.

Yanvarın 9-da ABŞ Dövlət Departamentinin mətbuat katibi Ned Prays Bəxtiyar Hacıyev və Tofiq Yaqublunun həbsindən dərin narahatlığını bildirib. "Biz hakimiyyəti onları mümkün qədər tez azad etməyə çağırırıq", - o deyib. 03B