Akif Çovdarovun işi üzrə məhkəmədə

Keçmiş MTN generalı Akif Çovdarov hüquqlarının pozulmasına etiraz olaraq guya 40 gündür davam etdirdiyi aclıq aksiyasını dayandırıb. Bu barədə vəkil Sadiq Rəsulov dekabrın 5-də Çovdarov və keçmişdə onun tabeliyində olan Akif Əliyev, Səlim Məmmədov və Orxan Osmanovun işi üzrə prosesdə bildirib.

Proses Sabunçu rayon məhkəməsində Həbib Həsənovun sədrliyi ilə qapalı rejimdə keçirilir. Vəkillərin və zərərçəkmişlərin verdiyi məlumata görə, zərərçəkmiş tacir Şahmar Qurbanovun həyat yoldaşı ifadəsində bildirib ki, əri "bir milyonluq" əmlakı - iki mənzili, sexi, avtomobilləri, brilyant zinət əşyalarını Çovdarova verməyə məcbur olub.

Qadın bildirib ki, əri ilə birlikdə Çovdarov və keçmiş nazir Eldar Mahmudov üçün brilyant gətirməyə gedirdi.

Çovdarov Qurbanovdan hədə yolu ilə 500 min dollar və ümumi dəyəri 380 min dollar olan brilyant alıb, deyə tacirin həyat yoldaşı bildirib.

Amma Çovdarov bu ittihamları təkzib edib, Qurbanova qarşı onun aldadaraq, fırıldaq yolu ilə pulunu mənimsədiyi  Hindistan vətəndaşının şikayəti əsasında araşdırma aparılırdı.

Proses dekabrın 19-da davam edəcək.

Çovdarov ötən il noyabrın 15-də MTN-in bir sıra yüksək vəzifəli əməkdaşlarına qarşı cinayət işi açıldıqdan sonra həbs olunub. Bu iş üzrə MTN-in 21 keçmiş əməkdaşı cəlb olunub, o cümlədən 19 nəfər həbsdədir. 

Çovdarov 179 (mənimsəmə və israf), 145 (qanunsuz azadlıqdan məhrumetmə), 308 (vəzifə səlahiyyətlərindən sui-istifadə), 311 (rüşvət alma) və digər maddələrlə ittiham olunur. -16D06-