Açiq mənbələrdən foto.
Bakı/29.12.21/Turan: Dekabrın 28-də jurnalistlərin parlamentin binası qarşısında keçirdikləri aksiya zamanı polis əməkdaşları iştirakçılardan birinə, Nərgiz Absalamovaya ciddi xəsarət yetiriblər.
Videogörüntülərdən məlum olur ki, polis qadın jurnalistin üzünə vurur və onu itələyir. Nəticədə Nərgiz Absalamova yerə yıxılıb və büzdüm sümüyü sınıb.
Həkimlərin rəyinə görə, qırılmış sümük çanaq əzələsinə zərər verib.
“Aksiya zamanı qadın polis boğazımdan yapışaraq məni itələdi. Eyni zamanda o biri polislər digər jurnalistləri itələdilər və biz yol kənarındakı bordürün üzərinə yıxıldıq və arxası üstə düşdük. Mən güclü zərbə aldım. Müayinədən sonra həkim üçhəftəlik yataq rejimi yazıb”, -jurnalist Turan agentliyinə bildirib.
Zərərçəkənin vəkili Zibeydə Sadıqova bildirib ki, bu fakt üzrə Travmatologiya İnstitutunun yazılı rəyi var.
Bununla bağlı Daxili İşlər Nazirliyi, Baş Prokurorluq və Ombudsman Aparatına yazılı sorğular göndərilib.
Şikayətdə çevik polis alayının əməkdaşının jurnalistə xəsarət yetirməsi faktı üzrə üzrə cinayət işinin açılması və günahkarların məsuliyyətə cəlb edilməsi tələb olunub, vəkil deyib.
Daxili İşlər Nazirliyinin mətbuat xidmətindən şərh almaq mümkün olmayıb. Bundan öncə bu bölmənin rəhbəri Ehsan Zahidov bildirib ki, aksiya zamanı jurnalistlərdən heç kim xəsarət almayıb.
Xatırladaq ki, onlarla jurnalist parlamentin "Media haqqında" yeni qanunu qəbul etməsinə etiraz edib. -03B-
Cəmiyyət
-
Azərbaycanın Ekologiya və Təbii Sərvətlər Nazirliyi (ETSN) ölkə üzrə genişmiqyaslı meşə bərpa səyləri barədə məlumat verərək, meşə ərazilərinin genişləndirilməsi məqsədilə on minlərlə ting əkildiyini açıqlayıb. Lakin tənqidçilər nazirliyin eyni zamanda özəl şirkətlərə torpaq icarəyə verməklə meşələrin qırılmasına şərait yaratdığını iddia edirlər.
-
Dekabrın 22-də Bakıda və Abşeron yarımadasında havanın dəyişkən buludlu olacağı, arabir tutulacağı, əsasən yağıntısız keçəcəyi gözlənilir. Lakin gecə və səhər bəzi yerlərdə çiskin olacağı ehtimalı var. Mülayim cənub-qərb küləyi əsəcək.
-
Çox vaxt "Qafqazın Dubayı" adlandırılan Bakı getdikcə sakinlərin mənzil hüquqlarının sistematik şəkildə pozulması ilə tanınmağa başlayır. Şəhərin yenilənməsi və yeni eleqant binaların inşası zamanı Azərbaycanın paytaxtında minlərlə ailə qanunsuz olaraq öz evlərindən məhrum edilib. Çoxları müqavimətin faydasız olduğunu bilərək, öz qiymətli əmlaklarına görə qeyri-adekvat pul kompensasiyasına razılaşır. Mənzil Məcəlləsinə inanan azlıq isə tikinti şirkətlərindən ədalətli təzminat tələb edir, ancaq çox vaxt hər şeyi itirir - həm evini, həm də təzminatın istənilən formasını.
-
Düşərgədə iştirak edən məktəblilər ölkəmizi üç nüfuzlu beynəlxalq olimpiadada təmsil edəcək Ölkəmizin beynəlxalq fənn olimpiadalarında təmsil etməyə hazırlaşan şagirdlərin hazırlıq prosesi müvəffəqiyyətlə davam edir. Azercell, Elm və Təhsil Nazirliyi və Təhsil İnstitutunun birgə əməkdaşlığı çərçivəsində Bakı Ali Neft Məktəbində bu məktəblilər üçün növbəti “İnformatika Düşərgəsi” təşkil olunub.
Rəy yaz