Ali Məhkəmə ANS-in şikayətini təmin etməyib (yenilənib)

Bakı/21.09.16/Turan: Azərbaycan Ali Məhkəməsi ANS telekanalının Milli Teleradio Şurasının təqdimatı əsasında lisenziyasının ləğvi barədə kassasiya şikayəti üzrə qərarını açıqlayıb. Ali Məhkəmə şikayəti təmin etməyib.

ANS telekanalının vitse-prezidenti Mirşahin Ağayev Ali Məhkəmənin qərarını şərh edərkən bildirib ki, teleşirkət Azərbaycan qanunvericiliyinin verdiyi imkanlar çərçivəsində öz yayımının bərpası üzrə fəaliyyəti davam etdirəcək.

* * *

Bakı/21.09.16/Turan: Sentyabrın 21-də Ali Məhkəmədə ANS müstəqil yayım və media şirkətinin lisenziyasının ləğvi barədə Bakı Apellyasiya Məhkəməsinin qərarından kassasiya şikayəti üzrə proses davam etdirilib.

Məhkəmə prosesinə  sədrlik edən hakim Sevda Hüseynova qərarın saat 15:-da elan ediləcəyini bildirib.

Milli Televiziya və Radio Şurası (MTRŞ) Türkiyə ilə Azərbaycan arasında strateji tərəfdaşlıq münasibətlərinin pozulmasına yönəlmiş təxribatın qarşısını almaq, açıq şəkildə terrorizmin təbliğatına yol verməmək məqsədilə Azərbaycan  Baş Prokurorluğunun müraciətini, “Televiziya və radio yayımı haqqında” qanununun tələblərini rəhbər tutaraq ANS müstəqil yayım və media şirkətinin yayımının 18 iyul 2016-cı il t saat 18:30-dan etibarən 1 ay müddətinə dayandırılması barədə qərar qəbul edib.

Bununla yanaşı MTRŞ ANS-ə verilmiş 25 oktyabr 2013-cü il tarixli xüsusi razılığın (lisenziyanın) qüvvəsinə xitam verilməsi barədə məhkəmədə iddia qaldırıb. Bakı Apellyasiya Məhkəməsin MTRŞ-nin iddiasını təmin edib, ANS-in lisenziyasına xitam verilməsi ilə bağlı qərar qəbul edib.

MTRŞ həmçinin ANS-ÇM radiosunun lisenziyasını ləğv edib.

Bu gün keçirilən məhkəmə prosesində  məhkəmə  tərəfləri dinləyib. ANS-in vəkili Fuad Ağayev telekanalı terrorçuluğa açıq çağırışda ittiham etmək üçün əsasların olmadığını deyib.

“ANS-i terrorçuluğu dəstəkləməkdə ittiham etmək üçün iki amil olmalıdır.  Bu çağırış ya efirdə getməlidir, ya da teleradio bunu müdafiə etməlidir. Amma, bunların heç biri yoxdur. Əgər bunlar yoxdursa Apellyasiya Məhkəməsi  nəyə əsaslanıb qərar qəbul edib”, - vəkil sual edib.

Onun sözlərinə görə, Apellyasiya Məhkəməsində baxış zamanı MTRŞ-nin izahatından başqa hər hansı araşdırma aparılmayıb.

“MTRŞ məhkəməyə ANS-in efirində  getmiş 13 saat 25 dəqiqə 27 saniyəlik video təqdim edib. Apellyasiya Məhkəməsindən videoya baxılması xahiş edilib. Amma məhkəmə  vəsatəti təmin etməyib. Məhkəmə isə araşdırılmamış sübutlara istinad edə  bilməz. Yalnız bu, Apellyasiya Məhkəməsinin qərarının ləğvini qeyd-şərtsiz edir”, - vəkil vurğulayıb.

F.Ağayevin sözlərinə görə, MTRŞ-nin ANS-i terrorçuluqla bağlı xəbərdar etməsi barədə  deyilənlərin əsası yoxdur. “MTRŞ-nin ANS-ə Türkiyədə dövlət çevrilişinə cəhdin baş verdiyi zaman iyulun 15-də, 16-da, 17-də, 18-də xəbərdarlıq etməsi barədə hər hansı qərarı yoxdur”.

Vəkil həmçinin bildirib ki, ANS Fətullah Gülənlə müsahibə barədə efirdə hər hansı anons verməyib.  “Xarici və  ya yerli medianın belə  bir anons verməsinin isə ANS-ə dəxli  yoxdur”, - o deyib.

 ANS-in prezidenti Vahid Mustafayev də vəkilin dediklərini təsdiq edib.

“Fətullah Gülənin mətbuat konfransında 15 müxtəlif ölkənin müxbirləri ilə birgə ihlas Ajansı, CNN Türk kanalının reportyorları ilə yanaşı ANS-in jurnalisti də iştirak edib. Məıtbuat konfransından video görüntülər iyulun 18-də ANS-ə daxil olub. Lakin ANS bu repotajın efirə verilməməsi  barədə  qərar qəbul edib və reportajdan kiçik bir hissə belə efirə  verilməyib. Həmin videolar məhkəməyə təqdim edilsə  də Apellyasiya Məhkəməsində baxılmayıb”, - o qeyd edib.  

V.Mustafayev eyni zamanda ANS-ÇM radiosunun lisenziyasının ləğvi ilə razılaşmır. “Bu radio Azərbaycanın Milli Qəhrəmanı Çingiz Mustafayevin adını daşıyır. Çingiz Mustafayev cəmiyyət üçün qəhrəmanlıq nümunəsidir. Belə olmaz axı…”, - o etirazını  bildirib.

MTRŞ-nin nümayəndəsi  Toğrul Məmmədov isə məhkəmədə  bildirib ki, deyilənlərin əsası yoxdur. “Terrorçuluğu yayan şəxsin çıxışına şərait yaradılması  terrorçuluğun təbliğidir”, - o qeyd edib.

Bundan sonra məhkəmə  müşavirəyə  gedib və  saat 15:00-da qərarın elan ediləcəyini bildirib.-03C-