Ali Məhkəmə fəalın zorlanması haqqında iş üzrə həbs olunmuş şəxs barəsində hökmü qüvvədə saxlayıb

Azərbaycan Ali Məhkəməsi gənc gender fəalı Sənay Yağmurun işi üzrə həbs olunmuş Əsgər Ağazadənin kassasiya şikayətini təmin etməyib. 

Yağmurun vəkili Zibeydə Sadıqovanın Turan-a verdiyi məlumata görə, təqsirləndirilən şəxs ona bəraət verilməsini istəyib.

"Lakin məhkəmə heyəti şikayəti təmin etməyib və digər instansiyaların qərarlarını qüvvədə saxlayıb", deyə Sadıqova bildirib. 

12 oktyabr 2022-ci il tarixində Bakı Ağır Cinayətlər Məhkəməsi yetkinlik yaşına çatmamış yeniyetmənin zorlanmasında ittiham olunan Ağazadəni 5 il müddətinə azadlıqdan məhrum edib.Ağazadə Azərbaycan CM-in 149.2.3-cü (zorlama, təqsirkar şəxs üçün aşkar surətdə yetkinlik yaşına çatmayan şəxsə qarşı törədildikdə) maddəsi ilə təqsirli bilinib. Bu maddədə 5 ildən 10 ilədək azadlıqdan məhrumetmə cəzası nəzərdə tutulur.

Sənay Yağmur Azərbaycan Xalq Cəbhəsi Partiyasının (AXCP) fəalı Fuad Qəhrəmanlının və yazıçı Zümrüd Yağmurun qızıdır.

Sənay Yağmur özü gender fəalı kimi tanınır.

Ağazadə ilə S.Yağmur qohumdur.