Ali Məhkəmə Rəsul Cəfərovun kassasiya şikayətinə fevralın 16-da baxacaq

Fevralın 16-sı saat 10.00-da Azərbaycan Ali Məhkəməsində hüquq müdafiəçisi Rəsul Cəfərovun kassasiya şikayətinə baxılması təyin edilib.

O, hələ yanvarın 21-də prosesə sədrlik edən hakim Fərhad Kərimova dinləmələrdə onun şəxsən iştirakını təmin etmək xahişi ilə müraciət göndərib.

“Hesab edirəm ki, qanunvericilikdə əksini tapmış hüquqlarımı nəzərə alaraq, prosesdə iştirakım təmin ediləcək. Sonuncu milli məhkəmə instansiyasının ədalətli qərar çıxaracağına ümidimi itirmirəm”, deyə Cəfərovun facebook səhifəsində yayılmış müraciətində deyilir.

İnsan Hüquqları Evinin rəhbəri və “Demokratiya naminə incəsənət” hüquq müdafiə kampaniyasının əlaqələndiricisi Cəfərov 2014-cü il avqustun 2-də qanunsuz sahibkarlıq, vergilərdən yayınma və səlahiyyətlərdən sui-istifadə ittihamı ilə həbs edilib.

2015-ci il aprelin 16-da o, 6,5 il müddətinə azadlıqdan məhrumetmə cəzasına məhkum edilib. İyulun 31-də Bakı Apellyasiya Məhkəməsi cəza müddətini 3 ay qısaldıb. Amnesty İnternational Cəfərovu “vicdan məhbusu” hesab edir. Beynəlxalq təşkilatlar, o cümlədən Avropa Şurası, Avropa İttifaqı və s. çoxsaylı bəyanatlarında Azərbaycan hakimiyyətini Cəfərovu və uydurma ittihamlarla həbs edilmiş digər hüquq müdafiəçilərini azad etməyə çağırıb. -06D-