�Amerika Senatı� Bakıda iclas keçirib

Bakı/24.02.18/Turan: Bu gün paytaxtdakı Landmark biznez-mərkəzində Amerika Birləşmiş Ştatları Konqresinin palatalarından biri, ABŞ Senatının səyyar iclası keçirilib. Toplantı üçün bu kompleksin ən geniş, oval zalı seçilib ki, 50-dən çox qanunvericinin, hüquqşünas və müstəqil ekspertin yerləşməsi mümkün olsun.

Tədbirin dili ingilis dili, mövzu hazırda ABŞ siyasi rəhbərliyi tərəfindən qızğın müzakirə olunan "Nüvə təhlükəsi. Şimali Koreya" olub.

Zalda işgüzar şərait yaradılıb: masaların üzərində notbuklar, mobil telefonlar, müxtəlif sənədlər, qanunvericilik aktları toplusu, mikrofonlar.

İlk baxışda burada qeyri-adi heç nə yoxdur, əgər görüş iştirakçılarının yaşını (görkəmcə amerikalı olduqları bilinmir, göz rəngi, boy, qamət və s.) gülümsər baxışları, opponentlə polemika zamanı utancaqlıq və bir qədər inamsızlığı nəzərə almasaq.

Masa arxasında əyləşən gənclər bu və ya digər faktları, rəqəmləri göstərmək üçün tez-tez öz bloknotlarına, sənədlərə baxırdılar, ola bilsin ki, Şimali koreyalı nazirlərin adlarını qarışıq salmışdılar. Onların narahatlığı anlaşılan idi: dünya siyasətində oyun qaydalarını diqtə edən böyük ölkənin senatorları rolunda hər gün çıxış etmirlər...

"ABŞ Senatı Modeli" Bakı konfransı Qərb və beynəlxalq qanunvericilik və ya humanitar təşkilatların təcrübəsi əsasında Azərbaycan gənclər parlamentarizminin formalaşdırılması üzrə layihə çərçivəsində ilk aksiyadır.

Söhbət simulyasiya (imitasiya) oyunlarından gedir. Bu oyunlarda həmin strukturların işi modelləşdirilir, mühüm problem müzakirə olunur, onun nizamlanmasına dair qərar qəbul edilir. Rol, münaqişəli oyunlar, qərarların qəbulu üçün oyunlar, işgüzar oyunlar, işgüzar oyun bazasında kompüter imitasiyası və s. sınaqdan keçirilir.

Bu il Bakıda BMT və Avropa İttifaqı modelləri üzrə belə tədbirlər keçirilib. Tədbirləri Avropa gənclər parlamentinin və Avropa İttifaqının Bakı ofisləri təşkil edib. ABŞ Senatı Modeli konfransının sponsoru ABŞ-ın Azərbaycandakı səfirliyidir. Forumun keçirilməsi ideyası "Amerika Təhsilli Azərbaycan Məzunları" İctimai Birliyinə məxsusdur.

Sözügedən QHT-nin fəal üzvü Samirə Qasımova Turan-a bildirib ki, beynəlxalq və regional strukturların modeli simulyasiya oyunlarını əhatə edir. Həmin iclas-imitasiyalarda gənclər diplomatlar, deputatlar, nazirlərin rolunda çıxış edirlər.
ABŞ Senatı Modeli konfransında ABŞ-ın 50-dən çox ştatından olan senatorların rolunda məktəb şagirdləri, ADA, Xəzər, Dillər universitetlərinin, BDU, Bakı Mühəndislik Universitetinin bakalavr və magistrları, həmçinin özəl şirkətlərin əməkdaşları çıxış edirlər. Yaş həddi 13-50 arasındadır.

S.Qasımovanın sözlərinə görə, BMT, Aİ və digər strukturların işinin tələbələr tərəfindən modelləşdirilməsi ən aktual, bəzən də ən ağrılı mövzular üzrə natiqlik və kommunikativ bacarıqların inkişafına, xarici dillərdə ünsiyyət təcrübəsinin əldə olunmasına xidmət edir.

ABŞ-ın Azərbaycandakı səfirliyinin mədəniyyət üzrə attaşesi Haydi Smit qeyd edib ki, diplomatik missiya bu tədbirin keçirilməsinə maddi yardım göstərib. Hazırda Azərbaycandan ABŞ-a təhsil almağa xeyli gənc gedir. Onlar mühəndislik, hüquqşünaslıq, menecerlik öyrənirlər. Ola bilsin ki, onlardan kimsə gələcəkdə siyasətçi və ya diplomat olsun. Polemika aparmaq bacarığına yiyələnmək, kompromis axtarmaq qabiliyyətini inkişaf etdirmək faydalı olar.

"Simulyasiya oyunları münaqişələrin idarə olunmasında innovativ və perspektivli metod hesab edilir. Onların özəlliyi gerçəyin simulyasiyasıdır. İştirakçılar müəyyən rolları ifa edirlər və mühüm problemləri oyun formasında müzakirə edirlər. Hədəfdən və hədəf qrupundan asılı olaraq diqqət mərkəzində siyasi və ya sosial proseslər, strategiyanın hazırlanması, oyun iştirakçılarının davranışının təhlili və ya münaqisənin dinamikası ola bilər. Oyunun formatı danışıqların və ya konfransların modelləşdirilməsindən başlamış kompleks simulyasiyalara qədər dəyişə bilər", -H.Smit qeyd edib.

Bu arada zalda gərginlik yaranıb. Alabama, Alyaska və İndiana ştatlarından olan "senatorlar" - Riçard Şelbi, Liza Murkovski, Coy Doneli (Şücaət Əhmədzadə, Əminə İsayeva və Abdul Mustafazadə) Şimali Koreyaya təzyiq göstərməyin yollarını qızğın müzakirə etməyə başlayıblar.

Kimsə adaya hücum etməyi təklif edib, digəri ölkə rəhbərliyi ilə birbaşa danışıqlara başlamağı məsləhət görüb, üçüncü münaqişəyə təhrik etmək istəyib.

ABŞ Senatı Modeli Bakı iclasında müzakirələrin sonunda sözügedən regionda hərbi gərginliyin azaldılması üçün diplomatik tədbirlərdən istifadə barədə qərar qəbul edilib.-0-