Bayıl sakinləri cüzi kirayə haqqından imtina edirlər

Bakının Bayıl qəsəbəsinin sakinlərinə nəhayət ki, mənzil icarəsi üçün vəsait ödənilir. Düz bir ay əvvəl Bayıl yamacında sürüşmə baş verib, nəticədə bir neçə evə ziyan dəyib, amma hakimiyyətin qərarı ilə təkcə ziyan dəymiş evlərdə deyil, bütün təhlükəli ərazidə yaşayan sakinlər sürüşmə zonasından köçürülüb. Bütünlükdə 98 ailə köçürülüb, onlar məktəblərə yerləşdiriliblər.

Hadisədən bir neçə gün sonra Səbail Rayon İcra Hakimiyyəti başçısı Eldar Əzizov bildirib ki, məsələnin bütün təfsilatı araşdırılana qədər müvəqqəti kirayə mənzil tuta bilmələri üçün sakinlərə kirayə pulu ödəniləcək. Bu qərarı ölkənin Nazirlər Kabineti qəbul edib: ekspertlərin sakinlərin öz evlərinə qayıtmasının mümkün olub-olmadığı barədə rəyinə qədər mənzil kirayəsinə görə vəsait ödəniləcək. Bununla paralel olaraq məlum olub ki, qəza vəziyyətində olan əksər evlərin sakinlərinin bu evlərə aid sənədləri yoxdur və deməli, onlar burada qanunsuz yaşayırlar, amma sakinlər özləri iddia edirdilər ki, 25 ildən çoxdur bu ərazidə məskunlaşıblar və bütün bu müddət ərzində kommunal xidmətlərə görə vaxtlı-vaxtında ödəniş ediblər, yerli hakimiyyətin heç bir iradı olmayıb.

Təxliyədən sonra bütün kommunal xətlərin bağlanmasına, işıq, qaz və suyun kəsilməsinə baxmayaraq, bəzi sakinlər evlərini tərk etməkdən imtina ediblər. Onlar bunu məktəblərdə yaşamağın qeyri-mümkün olması ilə əsaslandırıblar və mənzillərinə görə təzminat ödənilməsini tələb ediblər. Bir neçə gün yağan leysan yağışlardan sonra sürüşmə fəallaşıb, nəticədə bu sahədə dörd ev tamamilə dağılıb, ikisi isə yararsız hala düşüb.

Bütün bu müddət ərzində sakinlərin tələbləri və İH başçısının vədləri yerinə yetirilməyib. Yalnız bir ay sonra köçkünlərə kirayə pulu ödəməyə başlayıblar. Həm də pulu cəmi 67 ailəyə və əvvəlcədən iddia olunduğu kimi Azərbaycan Beynəlxalq Bankının kartına köçürmə ilə deyil, şəxsiyyət vəsiqəsi əsasında nağd olaraq ödəyiblər. Sakinlərin sözlərinə görə, onlara cəmi bir aylıq kirayə pulu ödəyiblər, onu da çox kiçik məbləğdə.

"Bizə söz veriblər ki, ödəniş məbləği 250-260 manat təşkil edəcək, amma cəmi 100-150 manat ödəyiblər. Bu məbləğ 3-4 nəöfərlik ailələrə ödənilib. 6 nəfərlik ailələrə 250 manat, 8 və daha artıq üzvü olan ailələrə isə 300 manat ödəyiblər. Bizə deyiblər ki, kartlar hələ hazır deyil, sonradan pul kartlara ödəniləcək. Abid Şərifov (baş nazirin müavini - red.) deyib ki, bizə kirayə pulu ödənilən kimi evlər söküləcək. Gecə "Azərsu" işçiləri sayğacları söküblər, bir neçə gün əvvəl elektrik enerjisi dirəklərini söküblər. Bu, o deməkdir ki, evləri həqiqətən sökəcəklər? Biz çoxumuz kirayə pulundan imtina etdik. Biz əvvəlki kimi təzminat tələb edirik", deyə sakinlər etirazlarını dilə gətirmək üçün bir-birinin sözünü kəsirlər.

Abid Şərifov özü jurnalistlərə bildirib ki, təxliyə qərarı yeganə doğru qərar idi və bu qərar 25 qəsəbə sakininin həyatını xilas etdi: "Nazirlər Kabinetinin Ehtiyat Fondundan bu sakinlərə mənzil kirayəsi üçün pul ayrılıb. Nazirlər Kabinetinin qərarı dağılan dörd evdə yaşayan 25 nəfəri xilas edib. Biz baxmalıyıq ki, sürüşmə prosesi dayanacaqmı, onun qarşısını necə almaq olar. Hələlik dəyişiklik yoxdur. Amma kiçik sürüşmələr davam edir. Sürüşmə zonasındakı evlər müdafiə olunur. Hələlik 97 evin sökülməsi, bütün sakinlərin köçürülməsi haqqında heç nə demək olmaz. Axı 97 evin sakinlərinin köçürülməsi asan vəzifə deyil", deyə baş nazirin müavini qeyd edib.

Sürüşmə zonası yaxınlığında yaşayan mərhum jurnalist Rasim Əliyevin ailəsi də köçkünlərin düşdüyü vəziyyətə düşüb. Jurnalistin anası Teyfurə Əliyevanın sözlərinə görə, sürüşmə onların evinə təsir etməsə də, onlar da köçmək məcburiyyətində qalıb.

"Bizi təcili qaydada köçürdülər. Axşam saatlarında gəldilər, dedilər ki, burada qalmaq təhlükəlidir və evimizi tərk etməyə məcbur etdilər. Biz hətta normal yığışa bilmədik, bütün əşyalarımız evdə qaldı, yalnız Rasimin portretini və bir-iki kiçik şey götürdük. Biz bir aya yaxın məktəbdə yaşadıq, amma sonradan nəvəmiz xəstələndi, öz hesabımıza kirayə ev tutmaq məcburiyyətində qaldıq. İndi mebeli daşıyırıq. Dünən bizə də kirayə pulunu ödəmək üçün 200 manat veriblər. Biz mənzil bir müddət əvvəl kirayə tutduğumuz üçün bu məbləğə qənaətbəxş bir yer tapmaq olardı. İndi bu, demək olar ki, qeyri-mümkündür. Bayılda icarəçilər kirayə mənzil tutmaq üçün pul ödənildiyini öyrəniblər və mənzil qiymətlərini bahalaşdırıblar. Bədbəxt insanlar mənzil axtarışında ora-buraya qaçırlar, amma Bayılda bütün evlər bahadır, bu qiymətlərə bir şey tapsalar da, mərkəzdən uzaq olacaq", deyə Əliyeva bildirib.

Teyfurə xanım əlavə edib ki, hazırda qəza vəziyyətində olan bütün evlərin sakinləri dindirilir.

"Qanunsuz tikinti faktı ilə bağlı cinayət işi açılıb. 46 saylı MİS-də Bakı Şəhər Prokurorluğunun müstəntiqlərindən ibarət qrup oturub. Onlar siyahı ilə bütün sakinləri dindirirlər. Bizi də dindiriblər, amma bizim problemimiz yoxdur, belə ki, biz evin "kupçası" olan yeganə ailəyik. Qalanların mənzillə bağlı sənədləri yoxdur, amma hamı, o cümlədən İcra Hakimiyyəti bilirdi ki, orada insanlar yaşayır. Bu, qanunsuzdursa, niyə tədbir görmürdülər? Təzminat məsələsi indiyə qədər açıq olaraq qalır. Biri deyir ki, təzminat istintaq və məhkəmə qərarından sonra ödəniləcək, İcra Hakimiyyəti nümayəndələri iddia edirlər ki, ekspertlərin rəyini gözləyirlər. Biz təzminat tələb edirik, kirayə mənzildə qalmaq bizi qane etmir, biz öz mənzilimiz olmasını istəyirik", deyə Teyfurə Əliyeva qeyd edib.