ABŞ yaşıl enerjiyə keçiddə Azərbaycana kömək edə bilər - Ali Zaidi

ABŞ bərpa olunan enerji mənbələrinə keçiddə Azərbaycan da daxil olmaqla, bütün ölkələrə kömək etməyə hazırdır. Bu barədə COP29 çərçivəsində keçirilən brifinqdə ABŞ-ın İqlim məsələləri üzrə milli müşaviri Ali Zaidi neft və qazdan təmiz enerji növlərinə keçiddə ABŞ-ın Azərbaycana necə kömək edə biləcəyi haqqında Turan-ın sualına cavabda bildirib.

"Bütün ölkələr nə vaxtsa başlamalıdır və karbohidrogenlərin mövcudluğu ölkənin təmiz enerjiyə keçə bilib-bilməyəcəyini müəyyən edən amil deyil.

Bu, texnologiyalar, daimi investisiyalar və iradə məsələsidir. Burada, COP29-da biz iqlim dəyişikliyinin hamıya təsir edən bir böhran olduğunu və Azərbaycanda və bütün dünyada təmiz enerji iqtisadiyyatı üçün həllin əlçatan olduğunu etiraf etmək üçün birləşə biləcəyimizi gördük", deyə o bildirib.

Daha sonra Zaidi qeyd edib ki, ABŞ bütün dünya ölkələrinə təmiz enerji iqtisadiyyatına keçidə başlamaqda kömək etməyə hazırdır. Bu keçid resurslarından asılı olaraq, müxtəlif ölkələr üçün fərqlidir.

Azərbaycanda offşor külək enerjisinin inkişafı üçün potensial var. ABŞ son dörd ildə bu sahədə kommunal müəssisələrdə təmiz enerjidən istifadə təcrübəsi yığıb.

"Nəticədə biz bir çox biliklər əldə etmişik, burada onları bölüşmək istəyirik, belə ki, ölkə (Azərbaycan) bu təmiz enerji mənbəyini mənimsəməyi hədəfləyir", deyə o qeyd edib.