Anar Bağırov: "Nemət Kərimli Kollegiyaya müraciət etməyib" � vəkil isə müraciət etdiyini deyir

Bakı/23.09.19/Turan: Vəkil Nemət Kərimli 16 saylı cəzaçəkmə müəssisəsində təzyiqə məruz qalması ilə bağlı Vəkillər Kollegiyasına müraciət etməyib.

Bu barədə Turan agentliyinə Vəkillər Kollegiyanın sədri Anar Bağırov deyib. O əlavə edib ki, buna baxmayaraq, məsələ ilə əlaqədar Vəkillər Kollegiyasının Rəyasət Heyəti dərhal ilkin araşdırma aparıb və deyilənlər hələ ki, öz təsdiqini tapmayıb.

"Belə olan halda vəkilin üzvü olduğu peşə birliyinə deyil, "Facebook" vasitəsilə açıq müraciət etməsi müvəkkilinə müəyyən maraq dairələri tərəfindən diqqət göstərilməsi üçün edilən hərəkət olduğu ehtimal olunur".

Bağırov əlavə edib ki, vəkil üzvü olduğu heç bir siyasi partiyanın əlində alətə çevrilməməlidir.

"Vəkil mötəbər olmayan, ara qızışdıran, heç bir sübutla təsdiqlənməyən məsuliyyətsiz bəyanatlar yaymamalı, "Vəkillər və vəkillik fəaliyyəti haqqında" qanunun, "Vəkillərin etik davranış qaydaları haqqında" əsasnamənin tələblərini pozmamalıdır".

Sədr vurğulayıb ki, mötəbərliyi və həqiqiliyi təsdiqini tapmayan bəyanatlarla bağlı maraqlı şəxslər tərəfindən Vəkillər Kollegiyasına müraciət olunduğu təqdirdə dərhal intizam icraatı başlanacaq və qanuna müvafiq qaydada hüquqi qiymət veriləcək.

Vəkil Nemət Kərimli isə Vəkllər Kollegiyası sədrinin bu iradına cavab olaraq bildirib ki, sentyabrın 21-də poçt vasitəsilə Kollegiya rəhbərliyinə məktub göndərib: "Yəqin ki, ayin 24-nə məktub ünvanına yetişər", N.Kərimli bildirib.

* Vəkil Nemət Kərimli sentyabrın 21-də bildirib ki, hüquqlarını müdafiə etdiyi Əfqan Muxtarlı ilə görüşə gedərkən üstündə axtarış aparıblar."Əvvəl razılaşmasam da, gərginlik yaratmamaq üçün icazə verdim, qanunsuz olaraq ayaqqabımın içini, corablara qədər axtarış etdilər. Görüşdən çıxarkən yenidən üzərimdə axtarış aparmaq istədilər. Qərar tələb etdim, dedilər, axtaracağıq. Kimisə çağırdılar, özünü rəis müavini kimi təqdim edən Emin adlı şəxs gəldi. Yenidən qərar tələb etdim, hamını axtarırıq, icazəmiz var dedi, söhbətdən sonra baxış keçirməyə icazə verdim. Yoxlayıcılar qeydləri oxumaq istədilər, icazə vermədim. Yenidən Emin müdaxilə etdi və dedi ki, rəis səni çağırır, qəbuluna gedək. Mən imtina etdim, Emin zorla köynəyimin yaxasından dartdı, divara tərəf möhkəm itələdi, "sən kimsən?, bura müəssisədi, sənə göstərərəm, kimə istəsən şikayət et, qəsdən skandal yaradırsan", qışqıra-qışqıra zorla rəisin yanına aparmaq istədi. İmtina etdim, əlimdəki çantanı zorla əlimdən aldı, içərisindəkiləri stolun üstünə tökdü, 2 vərəq başqa məhkəmə prosesindən olan və digər şəxsi qeydlərimi götürüb oxudu. Sonra rəisə məruzə etdi və sənədləri onun yanına apardı. Məni təxminən 45-50 dəqiqə otaqların birində girov saxladılar. Sonradan sənədlərimi verib, yola saldılar" , Nemət Kərimli qeyd edib.--0--