Apellyasiya Məhkəməsi AXCP sədrinin müşavirini həbsdə saxlayıb

Bu gün Bakı Apellyasiya Məhkəməsində hakim Əflatun Qasımovun sədrliyil ilə AXCP sədrinin müşaviri, xuliqanlıqda ittiham olunaraq 3 il müddətinə azadlıqdan məhrum edilmiş  Məmməd İbrahimin apellyasiya şikayətinə baxılıb.

Vəkil Yalçın İmanov Turan-a bildirib ki, məhkəmə M.İbrahimin şikayətini təmin etməyərək hökmü qüvvədə saxlayıb.

M.İbrahim prosesdə çıxış edərək həbsinin siyasi motivli olduğunu, məhkəmədən heç bir gözləntisinin olmadığını bildirib.

Hakim arada M. İbrahimin sözünü kəsərək  “mahiyyəti üzrə danışmağı” tələb edib.

Müdafiə tərəfi qərardan Ali Məhkəməyə kassasiya şikayəti verəcək. Şikayəti təmin olunmasa Avropa Məhkəməsinə müraciət ediləcək.

Qeyd edək ki, M. İbrahimin barəsində seçilmiş həbs qətimkanla bağlı ilkin şikayət Avropa Məhkəməsinə göndərilib. Şikayətdə azadlıq hüququnun (Avropa konvensiyasının 5-ci maddəsi)  pozulduğu  göstərilib.

Məmməd İbrahim sentyabrın 30-da keçmiş AXCP üzvü Mikayıl Quliyevin şikayəti əsasında həbs olunub. O, Mikayıl Quliyevi vurmaqda ittiham olunub. M.İbrahimə qarşı CM-in 221.1-ci (xuliqanlıq) maddəsi ilə ittiham irəli sürülüb. Bir müddət sonra daha iki nəfər - Oruc Vəliyev və Məhəmməd Qurbanov da şikayət verərək bildiriblər ki, insident zamanı M. İbrahim onları da vurub. Bundan sonra ittiham maddəsi ağırlaşdırılıb və CM-in 221.2.2-ci maddəsinə tövsif olunub. Martın 15-də Nərimanov Rayon Məhkəməsinin hökmü ilə M. İbrahim 3 il azadlıqdan məhrum edilib. O, ittihamı qəbul etmir və həbsinin siyasi sifariş olduğunu bildirir.-16D-