![Açiq mənbələrdən foto.](https://turan.az/resized/media/2022/main/040100042666-750-500-resize.webp)
Açiq mənbələrdən foto.
Aprelin 2-də Ramazan ayı, orucluq başlayır.
Bakı/01.04.22/Turan: Oruc tutan şəxslər bir ay ərzində öz gündəlik rasionuna dəyişiklik etməli olacaqlar. Bəs son 1 ildə Ramazan süfrəsində ən çox istifadə edilən ərzaqların qiymətlərində nə qədər bahalaşma var? Bu il süfrədə ötən illə müqayisədə bahalıq, qıtlıq gözlənirmi?
Bakı sakini Elşən Əliyev deyib ki, ötən ildəki kimi, bu il də ailəsi ilə birlikdə oruc tutacaq. Qiymətlərə gəlincə isə, ötən illə müqayisədə bəzi məhsullarda ciddi artım var. “Xurma, yağ, çörək qiymətlərində ciddi artım var. Bu məhsulların qiymət 80-90 faiz artıb. Ümumilikdə götürəndə isə, qiymətlərdə 25-30 faiz artım var. Ötən il ay ərzində 500 manat civarında pul xərcləmişəmsə, bu il xərcim 700-750 manat olacaq”.
Onun sözlərinə görə, qiymətlər artdığına görə rasionundan müəyyən ərzaqları çıxarmağa məcbur olacaq və ya daha az keyfiyyətli ərzaqlar ilə əvəz edəcək. “Amma bu da orqanizmə ziyandır. Çünki oruc tutan adam sağlam və yaxşı qidalanmalıdır. Səhər elə yeməkləri yemək lazımdır ki, həm gün ərzində mədəni incitməsin, nə də susuzluq yaranmasın. İndiki qiymətlərlə isə bunu etmək çox çətindir”.
Milli Məclisin İqtisadi siyasət, sənaye və sahibkarlıq komitəsinin üzvü Məzahir Əfəndiyev Turan-a bildirib ki, Ramazan ayının ən vacib məsələlərindən biri bayram və gündəlik süfrənin təşkil olunmasıdır. “Ramazan ayı bütün müsəlmanlar üçün müqəddəs, gözəl bir aydır və həmin ay ərzində süfrənin təşkil edilməsi vacib məsələdir. Amma dünyada baş verən gərgin münasibətlər, xüsusilə Rusiya-Ukrayna münasibətləri dünya iqtisadiyyatında da xoşagəlməz hadisələri müşahidə etməyə imkan verir”.
Deputatın sözlərinə görə, görünən budur ki, müəyyən bahalaşma bu il qaçılmazdır. “Dünyada baş verən bahalaşma, inflyasiya bizə də təsir göstərir. Amma, düşünürəm ki, Azərbaycanda qıtlıq və kəskin bahalaşma olmayacaq”.
İqtisadçı Rəşad Həsənov da ümumilikdə ötən il ərzində qiymətlərin qalxdığını bildirib. “Rəsmi statistika 16-17 faiz deyir, amma qeyri-rəsmi statistika təxminən 30 faiz ətrafında bahalaşmanın olduğunu deməyə əsas verir”.
Amma, ekspertin sözlərinə görə, Ramazan ayı dövründə xüsusi ərzaq növlərinə tələbat artır. “Bu kimi hallarda əlavə qiymət artımı təzyiqləri formalaşır. Ramazandan danışırıqsa, hər növbəti il Ramazan dövrü on gün irəliyə çəkilir. Bu, xüsusilə də kənd təsərrüfatı təyinatlı ərzaq məhsullarının mövsümündən nisbətən uzaqlaşdıqca Ramazanın bir vətəndaş üçün xərcləri də artır. Çünki qeyri-mövsüm dövrlərində kənd təsərrüfatı təyinatlı ərzaq məhsulları daha baha olur”.
O qeyd edib ki, bu il Ramazan ayı yazın başlanğıcına təsadüf edib. “Növbəti illərdə bu, qış aylarına doğru gedəcək və bahalaşma prosesi davam edəcək. Üstəgəl, müşahidə olunan inflyasiya da təsirini göstərir. Bu iki faktoru nəzərə alsaq, ötən illə müqayisədə bir nəfər üçün Ramazan xərcinin 32-35 faiz arta biləcəyini demək mümkündür”.-0-
-
- İqtisadiyyat
- 1 Aprel 2022 13:40
-
- Maliyyə
- 1 Aprel 2022 14:25
Cəmiyyət
-
Bazar günü, iyulun 28-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir.
-
Bakı şəhəri ərazisində qanunsuz miqrasiyaya qarşı mübarizə çərçivəsində müxtəlif ünvanlarda əməliyyat tədbirləri həyata keçirilib. Daxili İşlər Nazirliyindən verilən məlumata görə, Baş Dövlət Yol Polisi İdarəsinin qanunsuz miqrasiyaya qarşı mübarizə idarəsinin əməkdaşları tərəfindən Azərbaycan ərazisində yaşamaq və qalmaq hüququ verən sənədləri olmayan 34 əcnəbi müəyyən edilərək saxlanılıb.
-
Azərbaycan Müdafiə Nazirliyi (AMN) iyulun 25-də bəyanat yayaraq son günlərdə Ermənistanı Kəlbəcərdə ağır silahlar, Tovuz istiqamətində isə kvadrokopter tətbiq etməklə ona qarşı “təxribatlar törətməkdə” günahlandırıb. Üstəlik, Ermənistanın Qərb ölkələri ilə hərbi əməkdaşlığından narazılıq və narahatlıq ifadə edib.
-
Daxili İşlər Nazirliyinin Baş Narkotiklərlə Mübarizə İdarəsinin son əməliyyatları zamanı narkotik maddələrin qanunsuz dövriyyəsilə məşğul olan mütəşəkkil dəstənin 5 üzvü - əvvəllər məhkum olunmuş Bəhlul İsmayılov, Röyal Əliyev, Xəyal Alıyev, Samir Ağayev və Əli Məmmədli saxlanılıblar.
Rəy yaz