Arzu Ağazamanova: �Hədəfimiz lider qadınların yetişməsini dəstəkləməkdir�

"WoWoman Azerbaijan" qadınların arzularına çatması, inkişaf etmələri üçün məkan və imkan yaradan platformadır. Onun hədəfi lider qadınların yetişməsinə kömək etməkdir. Onlar üçün tədbirlər təşkil olunur. 2018-ci il üçün ən böyük hədəflərdən biri yalnız Bakıda yox, Azərbaycanın digər rayonlarında da fəaliyyətə başlamaq və qlobal olaraq platformanı daha da böyütməkdir. Bununla bağlı "Wowoman Azerbaijan" platformasının icraçı direktoru Arzu Ağazamanova "Amerikanın səsi"nə müsahibəsində bildirib.

Sual: Bu layihə Azərbaycanda qadın liderlərin rolunu inkişaf etdirmək üçün hansı yardımlar göstərir?

Cavab: Biz qadınların lider kimi yetişməsi üçün bir çox işlər görürük. Düşünürük ki, bunun üçün həm professional, həm də şəxsi inkişaf çox önəmlidir. Bundan ötrü informasiya texnologiyaları, digital marketinq, dizayn, idman, sağlamlıq və digər sahələrdə tədbirlər təşkil etmişik və edirik. Qadınların lider kimi yetişməsi üçün ünsiyyət, təqdimetmə, kütlə önündə çıxış etmə bacarıqları çox önəmli olduğu üçün bu sahədə bir çox proqramlar, kurslar təşkil edirik.

Sual: Bu günə kimi hansı isləri görmüsünüz?

Cavab: "Wowoman Azerbaijan" platforması 3 il yarımdır fəaliyyət göstərir. Bu illər ərzində 250- dən çox tədbir təşkil etmişik. Burada həmçinin kurslar, seminarlar olub. Tədbirlərdə həm yerli, həm də beynəlxalq təlimçilər iştirak ediblər. Bu tədbirlərə 8 mindən çox xanım qatılıb. Bundan başqa bizim qapalı Facebook qrupumuz var, 25 mindən çox xanım qrupun fəal üzvüdür. Bu xanımlarla biz hər gün motivasiya, uğurlarımız, arzularımız, karyera, səyahət və digər mövzularda müzakirələr aparırıq.

Sual: Arzu xanım, bəs "WoWoman In Me" proqramı nədən ibarətdir?

Cavab: "WoWoman In Me"-ni biz artıq ikinci dəfə həyata keçirəcəyik. Keçən il çox uğurlu alındığı üçün bu il də davam etdirmək qərarına gəldik. Bu layihə ABŞ-ın Azərbaycandakı səfirliyi tərəfindən dəstəklənir. Bu layihəni bizim təsisçimiz Zara Hüseynova Stanford və Harvard universitetlərində treninqlərdə iştirak edərkən öyrənib. Orada öyrəndiklərinin əsasında Azərbaycanda xanımların inkişafı üçün belə bir proqram yaradıb. Proqramda qadınlar 5 həftə ərzində intensiv olaraq ünsiyyət bacarıqları, komandanın idarə olunması, problemlərin həlli kimi bacarıqları inkişaf etdirirlər. Eyni zamanda layihələr yaradırlar, layihəni təqdim etməni, komandanı idarə etməyi öyrənirlər. Birinci layihə çox uğurlu alındı.

Sual: Bu layihə Azərbaycanın regionlarında tanınırmı? Regionlarda layihənin gerçəkləşməsi üçün hansı işləri görəcəksiniz?

Cavab: Bu günə kimi Gəncə şəhərində iki tədbirimiz olub. Keçən il "Wowoman"la bağlı bir xanım müraciət etmişdi. O, seçilmədi. Çünki Gəncədə yaşayırdı. Bu layihə sırf Bakıda yaşayan qadınlar üçün nəzərdə tutulmuşdu. Ancaq o xanım hər şənbə avtobusa minib Bakıya gəlib təlimdə iştirak edib Gəncəyə qayıdırdı. Bu dəfə biz istisna etdik. Regionlardan olan 10 qadının yol xərci qarşılanacaq. Bu yaxınlarda bununla bağlı nəticələri açıqlayacağıq. Bu xanımlar həm özlərinin inkişafına çalışır, həm də "Wowoman"ı özlərinin yaşadığı şəhərdə açmaq istəyirlər.16D06-