Aslan İsmayılov və Hafiz Haciyevin arasında məhkəmə çəkişməsi

Bakı/07.02.18/Turan: Bu gün Səbayel Rayon Məhkəməsində Müasir Müsavat Partiyasının sədri Hafiz Hacıyevin tanınmış hüquqşünas və ictimai xadim Aslan İsmayılova qarşı iddiası üzrə iclas keçirilib.

Məhkəmə qərara alıb ki, A.İsmayılovun H.Hacıyevin ünvanına söylədiyi fikirlərdə təhqirin olub-olmamasının aydınlaşdırılması üçün ekspertiza təyin edilsin. Dinləmələr qeyri-müəyyən vaxta təxirə salınıb.

A.İsmayılov xüsusi ittiham qaydasında məhkəməyə cəlb edilib və təqsirləndirilən şəxs kimi tanınıb. Bu qərarı fevralın 1-də Səbayel Rayon Məhkəməsinin hakimi Azər Tağıyev qəbul edib.

Xatırladaq ki, Müasir Müsavat Partiyasının rəhbəri Hafiz Haciyev A.İsmayılova qarşı CM-in 147-ci (böhtan) və 148-ci (təhqir) maddələrilə xüsusi ittiham qaydasında iddia qaldırıb.

Fevralın 1-də A.İsmayılov polis tərəfindən məcburi qaydada məhkəməyə aparılıb və təqsirləndirilən şəxs kimi tanınıb. A.İsmayılov iddianın əsassız olduğunu bildirib. O hesab edir ki, Milli Onkologiya Mərkəzində korrupsiya faktlarını, apteklərdə reseptsiz psixotrop maddələrin satışına dair faktları açıqladığına görə onu cəzalandırmaq üçün H.Hacıyevdən istifadə edirlər.

Bundan öncə A.İsmayılov H.Hacıyev tərəfindən diffamasiyaya məruz qalması iddiası ilə məhkəməyə müraciət edib. Məhkəmə çəkişməsi uzanıb. A.İsmayılov onun iştirakı olmadan məhkəmənin qərar qəbul etməsinə etirazını bildirib. Hüquqşünasa qarşı xuliqanlıq ittihamı ilə cinayət işi başlayıb.

Məhkəmə iclası başlamazdan öncə Aslan İsmayılov dövlət başçısının köməkçisi Əli Həsənovu ona qarşı təqiblərin təşkilində ittiham edib. O, həmçinin Ə.Həsənovu KİV-lərin, vətəndaş cəmiyyətinin məhvində, öz şəxsi məqsədləri üçün xidməti vəzifəsindən sui-istifadədə ittiham edib.

A.Ismayılov bildirib ki, o və onu müdafiə etməyə gələnlər təzyiqlərdən qorxub geri çəkilməyəcəklər, demokratik və ədalətli cəmiyyət uğrunda mübarizəni davam etdirəcəklər.-03C06-