ATƏT-in Bakı ofisi Azərbaycan hakimləri üçün treninq keçirib

ATƏT-in Bakı ofisi Azərbaycan Məhkəmə-Hüquq Şurası ilə birgə 20 azərbaycanlı hakim üçün çirkli pulların yuyulması və terrorizmin maliyyələşməsinə qarşı mübarizəyə dair iki günlük təlim kursu təşkil edib.

ATƏT-in Bakı ofisindən Turan-a verilən məlumata görə, treninqin məqsədi çirkli pulların yuyulması və terrorizmin maliyyələşməsinə qarşı mübarizə üzrə məhkəmə təcrübələri əsasında yaradılmış hüquqla yanaşı ATƏT-ə üzv olan dövlətlərin faydalı təcrübələri ilə hakimləri tanış etmək, eləcə də müvafiq beynəlxalq hüquqi bazaya dair onların bilik və bacarıqlarını artırmaq olub.

ATƏT-in Bakı Ofisinin İqtisadiyyat və Ətraf Mühit Şöbəsinin rəhbəri Emmanuel Huntzinger bildirib ki, belə seminarlar əvvəllər də keçirilib və prokurorların və hakimlərin bu sahədə biliklərinin artırılmasına şərait yaradıb.

Məhkəmə-Hüquq Şurası ilə birgə bu istiqamətdə fəaliyyəti davam etdirmək qərara alınıb.

Beynəlxalq ekspert Ari-Matti Nuutillanın keçirdiyi treninq zamanı beynəlxalq norma və standartlara xüsusi diqqət yetirilib. Dinləyicilər həmçinin Almaniyada mövcud məhkəmə işləri üzrə interaktiv seminarda iştirak ediblər. -06D-