Avropa İttifaqı Bakını mülkiyyət hüquqlarına hörmətlə yanaşmağa çağırıb

Avropa İttifaqı Azərbaycanda insan hüquqlarının pozulmasını diqqətlə izləyir. Bu barədə Avropa komissarı Ştefan  Fülenin nümayəndəsinin Sülh və Demokratiya İnstitutunun direktoru Leyla Yunusun adına ünvanladığı cavab məktubunda deyilir.

SDİ-dən Turan-a bildirilib ki, fevralın 18-də Fülenin adına məktub göndərilib. Məktubda Bakıda mülkiyyət hüquqlarının kütləvi şəkildə pozulması, həmçinin Bakı meriyasının məhkəmə qərarlarının icrasından imtina etməsi, keçmiş “Sovetski” küçəsində  kütləvi qanun pozuntuları və vətəndaşların hüquqlarının pozulması faktları sadalanır.

Aİ-nin Rusiya, Şərq Tərəfdaşlığı, Mərkəzi Asiya və ATƏT məsələləri üzrə şöbəsinin rəhbəri Dirka Şübelin imzaladığı məktubda deyilir:

“Aİ Azərbaycanda söküntü və məcburi köçürülmə faktları üzrə iddiaları diqqətlə izləyir. Belə ki, Aİ-Azərbaycan insan hüquqları və demokratiya üzrə alt komitənin fevralın 3-4-də keçirdiyi iclasda Aİ rəhbərliyi Azərbaycan hakimiyyətini söküntü və köçürülmə faktları ilə bağlı təcili tədbirlər görməyə çağırıb.

Biz həmçinin Azərbaycan hakimiyyətini məhkəmə qərarı nəticəsində mülkiyyətindən məhrum edilmiş şəxslərə yetərincə kompensasiyanın ödənilməsi, milli qanunvericiliyə və Azərbaycan  hökumətinin qəbul etdiyi beynəlxalq öhdəliklərə uyğun olaraq şəffaf məhkəmə çəkişmələrinin təminatı üzrə tədbirlər həyata keçirməyə çağırırıq”, - cavabda deyilir.     

SDİ mülkiyyət hüquqlarının kütləvi pozulması ilə bağlı Azərbaycan vətəndaş cəmiyyəti nümayəndələrinin, Bakıda mülkiyyət hüquqlarının pozulmasını izləyən beynəlxalq hüquq-müdafiə təşkilatlarının iştirakı ilə Aİ-də dinləmələrin keçirilməsi xahişi ilə komissar Füleyə ikinci məktubu göndərib.

SDİ-nin məlumatına görə, 2008-2012-ci illərdə 60 mindən çox Bakı sakini qanunsuz olaraq öz mülkiyyətindən məhrum edilib. 2014-cü ildə isə 80 min vətəndaşı evinin sökülməsi təhlükəsiz gözləyir.  

SDİ mülkiyyət hüquqlarının pozulmasının Bakıda qarşıdurmaya gətirə biləcəyindən  ehtiyat edir.—06D-