Avropa Oyunları iştirakçıları üçün yollarda zolaqlar ayrılıb

Avropa Oyunlarında iştirak edəcək idmançıları, yüksək vəzifəli qonaqları, texniki personal, KİV nümayəndəlri və tamaşaçıları daşıyan nəqliyyat vasitələri üçün Bakının yollarında xüsusi zolaqlar ayrılacaq. Bu barədə DİN Baş Dövlət Yol Polisi İdarəsinin məlumatında bildirilib.

Küçə və prospektlərin bir hissəsində sözügedən zolaqların çəkilməsinə başlanılıb.

Zolaqların ümumi uzunluğu 48 kilometr olacaq. İşlər mayın sonunadək başa çatdırılacaq.

Həmin zolarqlardan başqa nəqliyyat vasitələrinin istifadə etməsi qadağan olunur. Qaydanı pozanlar cəzalandırılacaq.

Avropa Oyunlarına hazırlıqla əlaqədar Bakının əsas magistrallarında təmir və yol göstəricilərinin yenilənməsi işləri davam etdirilir.

Belə ki, mayın 2-də saat 10:30-dan 17:00-dək Heydər Əliyev prospektində (aeroport və Sabuncu nəqliyyat qovşağı arasında) nəqliyyatın hərəkəri qismən məhdudlaşdırılacaq.

Şənbə günü saat 05:00-dən 17:30-dək Bilgəh qəsəbəsindən Nardaran qəsəbəsinə qədər Bakı dairəvi yolunun bir hissəsində nəqliyyatın hərəkəti məhdudlaşdırılacaq. Yol triatlon üzrə sınaq yarışlarının keçirilməsi əlaqədar bağlanıb.

Sürücülərə Buzovna-Maştağa-Nardaran alternativ yolundan istifadə etmək təklif olunur.

Bundan əlavə, iyunun 1-dən 30-dək Bakıya yük avtomobillərinin girişi qadağan olunacaq.—06D-