AXCP fəalının yaxınları hesab edirlər ki, Sahib Məmmədzadə polis təxribatının qurbanı olub

Azərbaycan Xalq Cəbhəsi Partiyası Daşkəsən təşkilatının sədri Sahib Məmmədzadənin bacısı, vəkili və partiya yoldaşı onun saxlanılma şəraiti və 4 ay müddətinə mühakimə edilməsi barədə Turan-a danışıblar.

"Sahib Məmmədzadə öz yük maşınında mal-qara daşıyırmış. Göygöl rayonundakı yol ayrıcında polis patrulu onu dayandırıb. Maşından düşməyi tələb edib. Sahib tabe olub, amma əvvəlcə mobil telefonunu bacısına verib ki, baş verənləri çəksin. Sahibin üzərində axtarış aparıb və amansızcasına döyüblər. Sonra maşında axtarış aparıblar. Sahibi döyərək polis maşınına mindirib Gəncə Daxili İşlər Nazirliyinin şəhər idarəsinə aparıblar və orada döyməyə davam ediblər", - Məmmədzadənin partiya yoldaşı Bəxtiyar Yusifov deyib.

Polis güc yoluyla saxlanılan şəxsin bacısı Tacirə Məmmədzadədən mobil telefonu alıb. O, Turan ilə söhbətində əlavə edib:

"Gözlərimin qabağında qardaşımı yerə yıxaraq döydülər. O, polis maşınına oturmaqdan imtina etdi, bir neçə polis əməkdaşı onu maşına itələdi. Sonra məndən hadisə yerindən qeydləri çəkdiyim telefonu verməyi tələb etdilər. Mən imtina etdim, mənə hücum etdilər, vurmağa başladılar, telefonu aldılar və qeydləri sildilər. Əlimdə qançır izi qaldı. Mənə dəymiş xəsarətlə bağlı həkim arayışı aldım", - Tacirə Mammədzadə deyib.

Gəncə birləşmiş şəhər xəstəxanasından verilən 18.03.24-cü il tarixli arayışda həkim Tacirə Məmmədzadə Mürvət qızının (1991-ci ildə anadan olub) sol əlinin zədələndiyini bildirib. Həkim yazır: "Onun sözlərinə görə, Daşkəsən postunda naməlum adamların zorakılığına məruz qalıb. Rentgenoqrafiya aparıldı, KT- analizə göndərildi. İmzaladı: Həkim Əsgərov".

Tacirə Məmmədzadə və Bəxtiyar Yusifov Sahib Məmmədzadənin günahsız olduğuna əmindirlər. Onlar hesab edirlər ki, polis təxribatı qəsdən Novruz bayramı ərəfəsində törədilib ki, Azərbaycanda yeddi qeyri-iş günü (20-27 mart) səbəbindən saxlanılan şəxsin yaxınları və vəkili Məmmədzadəni müdafiə edə bilməsinlər.

Azərbaycan Xalq Cəbhəsi Partiyası Daşkəsən rayon şöbəsinin müdiri Sahib Məmmədzadəni müdafiə edən vəkil Zabil Qəhrəmanov Turan ilə söhbətində əlavə edib:

"Məmmədzadəni ona məxsus yük maşınından zorla endiriblər, polis maşına baxış keçirib və orada narkotik maddə tapmayıb, lakin Məmmədzadənin geyimindən narkotik maddə çıxarıb. Müttəhim bildirir ki, narkotik maddəni onun üzərinə polis qoyub", - vəkil deyib.

Bayram tətililə əlaqədar Qəhrəmanov Gəncə İstintaq Təcridxanasında saxlanılan Sahib Məmmədzadə ilə hələ ki görüşməyib. Vəkil müdafiə xəttini müttəhimlə görüşdən sonra müəyyənləşdirəcək. Lakin o deyib ki, Məmmədzadə özünü təqsirli bilmir və özünü polis təxribatının qurbanı hesab edir.

"Məmmədzadə istintaq hərəkətləri müddətində istintaq təcridxanasında dörd ay həbs cəzasına məhkum edilib. O 234.3.4-cü (külli miqdarda narkotik maddənin saxlanması) maddə ilə ittiham olunur. Bayramlar başa çatdıqdan sonra - martın 27-də Gəncə Apellyasiya Məhkəməsinə müraciət edərək Sahib  Məmmədzadənin barəsində həbs qətimkan tədbirinin ev dustaqlığına dəyişdirilməsini xahiş edəcəyəm", - vəkil Zabil  Qəhrəmanov deyib.

Novruz bayramı və qeyri-iş günləri səbəbindən Daxili İşlər Nazirliyindən şərh almaq mümkün deyil.

Daxili İşlər Nazirliyinin mətbuat xidmətindən Turana bildirilib ki, iddialar əsassızdır: "Sahib Məmmədzadənin bacısının səsləndirdiyi fikirləri qardaşına qarşı olan şübhələrdən diqqətini yayındırmaq məqsədini daşıyır".

DİN-dən qeyd olunub ki, hazırda istintaq hərəkətləri davam etdirilir.