Azərbaycan əhalisinin 5,4 faizi tam vaksinasiya olunub

Bakı/05.05.21/Turan: 2 may 2021-ci il tarixinə olan duruma görə, Azərbaycanda 1 milyon 516 min 923 nəfər peyvənd edilib ki, bu da ölkə əhalisinin 15,2 faizin təşkil edir. 541 min 715 nəfər, başqa sözlə, əhalinin 5,4 faizi isə tam vaksinasiya olunub. Bu barədə Azərbaycanın iqtisadiyyat naziri Mikayıl Cabbarov Avropa İnkişaf Bankının illik ümumi yığıncağı zamanı baş tutan “CAREC-in 20 ili: rəqəmsal transformasiya yolu ilə regional əməkdaşlığın yenidən nəzərdən keçirilməsi”  mövzusunda yüksək səviyyəli onlayn görüşdə bildirib.

Onun sözlərinə görə, Azərbaycan hökuməti hazırda pandemiya ilə mübarizə istiqamətində intensiv iş aparır.

“2021-ci ilin yanvarında “Azərbaycan Respublikasında COVID-19 xəstəliyi əleyhinə 2021-2022-ci illər üçün Vaksinasiya Strategiyası” qəbul edilib. 18 yanvar 2021-ci il tarixindən isə əhaliyə COVID-19-a qarşı vaksin vurulması prosesi başladılıb və uğurla həyata keçirilir”, - o qeyd edib.

Mayın 2-də Azərbaycan səhiyyə nazirinin müavini Viktor Qasımov bildirib ki, Azərbaycanda bu ilin yanvar ayından vaksinasiyaya başlanılıb.

“İndiyədək ölkəyə 2 milyondan çox peyvənd materialı gətirilib. İlk olaraq Çin istehsalı olan peyvənddən istifadə olunub. Sonra “AstraZeneca” vaksinləri gətirilib. Bu gün isə Rusiyadan Azərbaycana koronavirus əleyhinə 40 min doza “Sputnik V” vaksini gətirilib”, - o qeyd edib.-03-