Azərbaycan hərbçisinin əsir götürülməsi xəbərini təkzib edir

Ermənistan mediası Dağlıq Qarabağdakı rəsmi mənbələrə istinadən dumanlı şəraitdən istifadə edən Azərbaycan Ordusunun kəşfiyyat-diversiya qrupunun qarşısını aldığı və bir hərbiçini əsir götürdüyü barədə məlumat yayıb.

Məlumata görə, hadisə fevralın 1-də cəbhənin şimal hissəsində, 2016-cı ilin aprelində uğrunda aktiv döyüşlərin getdiyi Talış kəndində baş verib. Nəticədə Azərbaycan Ordusunun 1 hərbiçisi yaralanıb və  Bərdə şəhərindən olan hərbiçi Elnur Hüseynzadə əsir götürülüb.

Azərbaycan Müdafiə Nazirliyinin mətbuat xidməti xəbəri təkzib edib.

“Azərbaycan Silahlı Qüvvələri bölmələrinin fevralın 1-də cəbhə xəttində guya təxribat törətməsi və itki verməsi barədə erməni tərəfinin yaydığı məlumat yalandır. Cəbhə xəttində heç bir aktiv döyüş toqquşması baş verməyib. Erməni tərəfinin yaydığı xəbərdə adı çəkilən Elnur Hüseynzadə mütəmadi olaraq hərbi intizamı pozması və xidmətə çıxmaması səbəbindən bir müddət əvvəl Silahlı Qüvvələrdən tərxis olunub və hazırda hərbi xidmətdə deyil”, deyə mətbuat xidmətinin məlumatında bildirlir. -03D-