Azərbaycan investorları Rusiyanın ermənilər yaşayan bölgələrinə sərmayə qoyurlar

Yeni iqtisadi obyektlərin inşası və təzə iş yerlərinin açılması üçün Azərbaycan iqtisadiyyatına investisiyalar yönəldilməlidir. Ona görə də 2016-cı ildə Bakıda keçirilmiş IV Dünya Azərbaycanlıları Qurultayının açılışında çıxış edən prezident İlham Əliyev xaricdə yaşayan azərbaycanlıları ölkəmizə sərmayə qoymağa çağırıb.

Həmin azərbaycanlıların tarixi vətənlərinin iqtisadiyyatına yönəltdiyi vəsait axını haqqında heç bir məlumat yoxdur, amma Bakının iqtidaryönlü mətbuatı və Rusiya KİV-ləri Azərbaycandan kapitalın Rusiyaya leqal surətdə daşınması barədə müntəzəm olaraq xəbər verir. Bizim milyarderlər xüsusi olaraq Rusiya Federasiyasının Stavropol diyarını bəyənib seçiblər.

Kislovodskdakı "Akademiçeskiy" sanatoriyasını Azərbaycanın "Karat Holding" Şirkətlər Qrupu bərpa edəcək. 1934-cü ildə tikilmiş və istifadə olunmayan bu binanın bərpası üzrə $40 mln. həcmində investisiya sazişi 2017-ci ilin aprelində imzalanıb.

Deputat Əsabil Qasımova məxsus həmin bu "Karat" həm də Gürcüstanda unüyütmə biznesi ilə məşğul olur və Gürcüstan KİV-lərində bildirildiyi kimi, yerli taxılçılar assosiasiyası "Karat-Holdinq"i bu ölkənin taxıl bazarı və unüyütmə sənayesində inhisarçılıqda ittiham edir. Bundan başqa, bir neçə il öncə, Gürcüstan hökuməti onu vergidən yayınmada günahlandırmışdı. Azərbaycan mətbuatı isə "Karat Holdinq"in Vətəndə çıxartdığı oyunlardan xəbər verirdi. Azərbaycan KİV-də holdinqin tikinti biznesi sahəsində dələduzluq etdiyi haqda məlumatlar dərc olunmuşdu. Deputat Ə.Qasımovun adamları firmanın keşikçisinin adına saxta rəsmi kağızlar sənədləşdirirdilər və nəticədə bu "yolayıran" həbs olunmuşdu.

Əvvəllər həmin holdinq Yessentuki şəhərində irihəcmli investisiya layihəsi həyata keçirib. 2016-cı ildə orada 1,5 mlrd. rubl dəyərində 440-yerlik "İstoçnik ("Çeşmə)" sanatoriyası tikilib.

İnşaat firmalarımız prezidentin çağırışına cavab olaraq Azərbaycan iqtisadiyyatını inkişaf etdirmək əvəzinə, Rusiyanın cənubunda qızğın faliyyət göstərirlər. Stavropol diyarının hökuməti, Kislovodsk administrasiyası və "Azneftmaş" Şirkətinin prezidenti Şahmar Vəliyev Rusiya-Azərbaycan Regionlararası Forumu çərçivəsində ""Rusel" Sanatoriyasının Tikintisi" İnvestisiya Layihəsinin həyata keçirilməsi üzrə niyyət sazişini imzalayıblar. Bunu Kislovodsk administrasiyasının mətbuat xidməti bildirib. Qoyulacaq sərmayənin ehtimal olunan həcmi 2 mlrd. rubl təşkil edir. Sanatoriya 2021-ci ilədək açılmalıdır.

Gəncədə iyulun 3-də güllə silahlı hücuma məruz qalmış icra başçısı Elmar Vəliyevin doğmaca qardaşı, "Azneftmaş" ASC-nin prezidenti Şahmar Vəliyev qardaşının yaralanmasına sevinənləri erməni adlandırıb: "Elmara güllə atanı milli qəhrəman etdilər. Bunu edənlər də, Elmara atəş acan da - ermənidir. Bu insanları, sadəcə, başqa cür adlandırmaq olmaz". Ş. Vəliyev özünü nümayişkaranə şəkildə qatı ermənifob və etiqadlı vətənpərvər kimi qələmə verir. Amma nədənsə milyonlarla vəsaiti Vətənində deyil, Rusiyanın ermənilərin sayca ikinci etnik qrup olduğu Stavropol diyarında xərcləyir.

Rusiya üzrə demoqrafik məlumatlara müraciət edək. 2010-cu ildə keçirilmiş Ümumrusiya əhalinin siyahıya alınması məlumatlarına görə, Stavropol diyarında 120 xalq yaşayır. Burada rusların xüsusi çəkisi 80% (2,2 mln. nəfər) təşkil edir ki, bu da 1959-cu ildə olduğundan 11% azdır. Stavropolun sayına görə ikinci etnosu ermənilərdir - 6% (161,3 min nəfər, 1959-ci ildə - 1,5%). Yəni orada rusların sayı azalır, ermənilərin sayı isə artır. Azərbaycanlılar hər birinin sayı 15 mindən 50 minə qədər olan etnik azlıqlar qrupuna daxildir.

Azərbaycan biznesi prezident İ.Əliyevin ölkəmizə sərmayə qoyuluşu barədə tapşırığını sadəcə dinləyir, amma investisiyaları Rusiyanın ermənilərin onsuz da çox olduğu və gələcəkdə üstünlük təşkil edən etnosu ola biləcəyi cənub bölgəsinə yönəldir. Bütün bunlar prezidentin gözü qabağında baş verir, RF-də Azərbaycan pullarına sanatoriyanın tikilməsi üzrə bir investisiya sazişini isə şəxsən İlham Əliyevin özü imzalayıb. Bunu necə başa düşmək olar?

Statistikaya əsasən, 2016-cı ildə Azərbaycanın xaricə yönəltdiyi birbaşa investisiyalar $2,5 mlrd.-dan çox olub.