Azərbaycan ötən əsrin 30-cu illərinəmi qayıdıb?

Son vaxtlar Azərbaycanda  jurnalist və tənqidçi media resusları təmsilçilərinin həbslərindən əvvəl hökumət nümayəndələri, hakimiyyətə yaxın mediaların həmin şəxsləri hədəf seçməsi, onları  “casus”, “vətən xaini” elan etmələri müşahidə olunmaqdadır.

Hətta ABŞ-da təhsil almış  şəxslərlə  bu ölkənin Azərbaycandakı səfirliyinin təşkilatçılığı ilə keçirilməsi planlaşdırılan görüş iştirakçıları da “casus şəbəkəsi” kimi təqdim olundu.
Milli Şuranın sədri, tarixçi professor Cəmil Həsənli  AzadlıqRadiosuna bildirib ki, bu 1937-ci ilin dəsti xəttidir, 1937-nin qaralama metodur:

“37-də kimin haqqında həbs qərarı verilirdisə, ona qarşı mətbuatda qaralama kampaniyası başalayırdı. NKVD (Наро‌дный комиссариа‌т вну‌тренних- Xalq Daxili İşlər Komissarlığı)  onlar əleyhinə öz əlaltılarına "ifşaedici” material verirdilər. Və ya ayrı-ayrı adamlara onlar əleyhinə yazmaq tapşırığı verirdilər. İclaslardakı çıxışlarda onlara məhkəmədən öncə "xalq düşməni" damğaası vururlurdu. Məsələn Hüseyn Cavidə, Mikayil Müşfiqə, Əhməd Cavada, Abbas Mirzə Şərifzadəyə qarşı həbsdən əvvəl belə kampaniyalar olmuşdu”.

Onun fikrincə, XXI əsrin 20-ci illərində ölkə yenidən 37-ci ilin medodlara qayıdıb: “Adamlar həbsdən öncə informasiya hücumuna məruz qalır, mediada təhdid edilir, məhkəmənin hökmü olmadan haqqında "cinayətkar", "agent", "casus", "5-ci kolon" və sair ifadələr işlədilir. Son vaxtlar Doktor Qubad İbadoğluna, “AbzasMedia”nın rəhbərləri Ülvü Həsənli və Sevinc Vaqifqızına, Toplum TV-yə qarşı belə qaralama kampaniyası müşahidə olunur”.

Müdafiə Xətti hüquq müdafiə təşkilatının həmtəsisçi Rüfət Səfərov da bildirib ki, Azərbaycanda hazırda diktaturaya keçid dövrü yaşanır və bu gün mövcud sistem heç bir hüquqla məhdudlaşmayan fəaliyyətə malikdir: “Yəni, müstəqil fikrə, azad mediaya yer yoxdur və son dövrlər ərzində baş verən həbslər buna əyani sübutdur. Bu da onu göstərir ki, tarixçilərin “hazırda 37-ci il yaşanır” fikirləri doğrudur”.

Onun fikrincə, Azərbaycan hakimiyyəti zaman-zaman süni əsaslarla, uydurma motivlərlə ölkə daxilində “casus ovu”na çıxır: “Hökumətin hansı xarici ölkə ilə siyasi, diplomatik ziddiyyətləri meydana çıxırsa, mexaniki olaraq ölkənin daxilində “casus ovuna” çıxılır. Bu onu göstərir ki, dövlət institutları vətəndaşın bütün həyatını, fəaliyyətini, hüquqlarını nəyinki nəzarətə götürüb, bütövlükdə kobud müdaxilələrə məruz qoymaqdadır”.

Milli Məclisin Beynəlxalq münasibətlər və parlamentlərarası əlaqələr komitəsinin üzvü Elman Nəsirov  isə Turana bildirib ki, özünə hörmət edən dövlət oxşar situasiyalarda adekvat addımları atır. Onun fikrincə, Amerika Birləşmiş Ştatlarının bir sıra qurum və təşkilatlarının fəaliyyətində üzə çıxan təhlükəli tendensiyalar belə qiymətləndirmələri labüd edə bilər.
Deputatın sözlərinə görə, ölkənin daxili işlərinə qarışmaq üçün onlar ilk növbədə media qurumlarının fəaliyyətindən, vətəndaş institutları imkanlarından bəhrələnirlər: “İndiki halda da biz bu tendensiyanın və bu faktların öz təsdiqini tapdığını görürük. Belə ki, Abzas Media qurumu araşdıranda, onun elə bir ciddi gəlir mənbəyi yoxdur, bu sıradan bir mətbu orqandır. Amma onun ofisindən 40 min xarici valyuta tapılıb. Eyni zamanda müxtəlif beynəlxalq donor təşkilatları tərəfindən maliyyələşdirilməsi ilə bağlı çox ciddi şübhələr var”.

Deputat E.Nəsirovun fikrincə, “dumanlı məqamlar” göstərir ki, ABŞ bir sıra rıçaqları vasitəsilə ölkələrin daxili işlərinə qarışmaq, o ölkələrdə vətəndaş həmrəyliyini pozmaq, səfərbər olmuş cəmiyyəti dağıtmaq kimi qanunazidd addımları atır: “Bu məqsəd üçün də “əl üzünü yuyar” prinsipi ilə işləyir. Belə olan halda “Abzas Media” qurumla bağlı məsələlərdə siyasi motiv yoxdur, birbaşa cinayət əməli var. Media qurumları da, vətəndaş media institutları da bilməlidir ki, dövlətin strateji milli maraqları əleyhinə fəaliyyət göstərmək, ölkənin Konstitusion quruluşu üçün təhlükə yaratmaq, qaçaqmalçılıqla məşğul olmaq kimi qanunazidd hərəkətlərə qanuna uyğun qiymət verilir. Analoji yolu seçmiş medialar bu faktdan nəticə çıxarmalıdır”.

Deputat hesab edir ki, bu prosesləri “37-ci il repressiyaları” adlandırmaq absurddur və bu məsələdə heç bir siyasi təqib yoxdur.