Azərbaycan və Gürcüstan sərhədyanı zonalarda teleradio yayımının keyfiyyətini yaxşılaşdırırlar

Bu gün Azərbaycanla Gürcüstan arasında GSM texnologiyalarının, SDMA rabitə siqnallarının tətbiqi perspektvləri üzrə protokol imzalanıb. Sənəd həmçinin sərhədyanı zonalarda rəqəmsal televiziya və FM radiokanalların yayımı haqqında razılaşmanı əhatə edir. Bu barədə Rabitə və İnformasiya Texnologiyaları Nazirliyinin mətbuat xidməti məlumat yayıb.

Nazir Əli Abbasov Gürcüstanla əməkdaşlıqdan danışarkən qeyd edib ki, Azərbaycan Transavrasiya superinformasiya magistralı (TASİM) layihəsinin koordinatorudur. Qərbi Avropadan Şərqi Asiyaya qədər transmilli fiber-optik xəttin çəkilişini nəzərdə tutan bu layihəyə Gürcüstan da  qoşula bilər.

Layihədə qonşu ölkələrin iştirakının strateji əhəmiyyətini vurğulayan nazir qonşu ölkələr tərəfindən layihənin dəstəklənəcəyinə ümidvar olduğunu bildirib.

Öz növbəsində Gürcüstanın rabitə nazirinin müavini Kumsişvili iki ölkə arasında strateji tərəfdaşlığı və dost əlaqələri qeyd edib. O, Azərbaycanın ilk telekommunikasiya peykinin üstünlyünü və bu peyk vasitəsilə Gürcüstan kanallarının yayımlanmasının vacibliyini vurğulayıb.

Kumsişvili sərhədyanı zonalarda rəqəmsal yayımın inkişafının vacibliyini qeyd edib.

Bu sahədə protokolun imzalanması hər iki tərəfin operatorlarına bu texnologiyanı inkişaf etdirməyə imkan verəcək.

Görüşdən sonra tərəflər arasında yeni GSM texnologiyalarının tətbiqi perspektivləri üzrə protokol imzalanıb. -02D-