Azərbaycan Xalq Cəbhəsi Partiyası fəallarının məhkəməsi sübutların tədqiqi ilə davam edib

Bakı/24.05.21/Turan: Mayın 24-də Bakı Apellyasiya Məhkəməsinin binasında Səbail rayon Məhkəməsinin sədri Ağamalı Qafarovun sədrliyi ilə Azərbaycan Ordusuna dəstək üçün 2020-ci il iyulun 14-də keçirilən aksiya zamanı yaranmış insident faktı üzrə ittiham edilən şəxslərin cinayət işi üzrə məhkəmə prosesi sənədlərin tədqiqi ilə davam etdirilib.

Növbəti məhkəmə iclası mayın 26-na təyin edilib.

Bugünki prosesdə ittiham tərəfinin təqdim etdiyi videosübutlara baxılıb.

“Bəlli oldu ki, cinayət işini “düzüb-qoşan” İstintaq Qrupu heç Milli Məclisin qapılarının hansı istiqamətə açıldığını da bilmir. Proses boyu istintaqın təlimatı üzrə danışan butün şahidlər Milli Məclisin binasının qapılarının açılması barədə belə deyiblər: kütlə onları qapılara sıxıb, nəticədə qapılar içəriyə doğru açılıb. Lakin ittiham tərəfin “videosübutları” əyani olaraq göstərdi ki, Milli Məclisin qapıları içəriyə yox, çölə açılırmış”, deyə təqsirləndirilən Ayaz Məhərrəmli bildirib.

Onun sözlərinə görə, təqdim edilən videolarda ittihamı sübut edəcək heç bir kadr yoxdur.

Məhkəməsi keçirilən qrupa Azərbaycan Xalq Cəbhəsi Partiyasının (AXCP) fəalları Məmməd İbrahim, Fuad Qəhrəmanlı, Ayaz Məhərrəmli, Bəxtiyar İmanov, Müsəlman Birliyi Hərəkatının 2 üzvü və digər 6 nəfər daxildir.

Təqsirləndirilən şəxslər Cinayət Məcəlləsinin 186 (əmlakı qəsdən məhvetmə və ya zədələmə), 233 (ictimai qaydanın pozulmasına səbəb olan hərəkətlər təşkil etmə ) və 315-ci (hakimiyyət nümayəndəsinə zor tətbiq etmə) maddələri ilə günahlandırılır.

Bu cinayət işi üzrə 37 nəfər təqsirləndirilən, 22 nəfər zərərçəkən şəxs var. Ötən ilin noyabr-dekabr aylarında həbsdə saxlanılan təqsirləndirilən şəxslərin hamısı polisin nəzarətinə verilməklə sərbəst buraxılıb.

Təqsirləndirilən şəxslərdən 16 nəfəri Azərbaycan Xalq Cəbhəsi Partiyasının, 2 nəfəri Müsəlman Birliyi Hərəkatının, 1 nəfəri Azərbaycan Demokratiya və Rifah Hərəkatının fəalıdır. Təqsirləndirilənlər arasında Naxçıvanın keçmiş daxili işlər naziri Siyavuş Mustafayev də var. Qalanları bitərəflərdir.

2020-ci il iyulun 14-də Bakıda minlərlə insanın Ermənistan-Azərbaycan sərhədində gedən döyüşlərə dəstək məqsədilə keçirdiyi yürüş-mitinq iyulun 15-də səhərə yaxın polis tərəfindən dağıdılıb. Aksiyanın dağıdılması zamanı polis su şırnaqlarından, gözyaşardıcı qazdan və dəyənəklərdən istifadə edib.

Belə ki, gecə saatlarında bir qrup aksiya iştirakçısı parlamentin binasına daxil olub, polis avtomobili aşırılıb. Bu zaman polis aksiyaçıları parlamentin binasından çıxarıb və polislə qarşıdurma yaşanıb.

Yaranmış insidentlə bağlı cinayət işi qaldırılıb, çoxsaylı insan həbs edilib.

Rəsmi qurumlar həbs edilənlərin sayı barədə məlumat verməsə də, hüquq müdafiəçiləri onların sayının yüzdən çox olduğunu güman edir. Onların çoxu inzibati qaydada cəzalandırılıb.

Azərbaycan Xalq Cəbhəsi Partiyasının məlumatına görə, Azərbaycan Ordusunu dəstəkləmək məqsədi ilə iyulun 14-də keçirilən aksiya zamanı yaranan insident faktı üzrə qaldırılmış cinayət işi üzrə bu partiyanın 45 nəfər fəalı həbs edilib.

“Onlardan 16 nəfərinə qarşı ağır ittihamlar irəli sürülüb. 15 nəfər inzibati qaydada həbs edilib, 14 nəfər şahid qismində dindirilərək sərbəst buraxılıb”, deyə məlumatda qeyd edilir.

Azərbaycan Xalq Cəbhəsi Partiyası və digər bir sıra siyasi qurumlar həbsləri “siyasi sifariş” hesab edir. -03-