Azərbaycana qar yağıb

 Dekabrın 4-ü səhərədək ölkə ərazisində hava şəraiti kəskin dəyişib, şimal-qərb küləyi şiddətlənib, əksər rayonlarda yağıntılı olub, bəzi yerlərdə intensivləşib, sulu qar və qar yağıb. 

Ekologiya və Təbii Sərvətlər Nazirliyinin Milli Hidrometeorologiya Departamentinin məlumatına görə, Abşeron yarımadasında noyabrın 3-də axşam saatlarında yağış sulu qara keçib. 

Şimal-qərb küləyinin sürəti Mingəçevirdə 35 m/s, Tərtərdə 33 m/s, Zərdabda 32 m/s, Bərdə, Naftalanda 30 m/s, Ceyrançöl, Göyçayda 28 m/s, Gəncədə 24 m/s, Ağstafa, Tovuz, Biləsuvarda 22 m/s, Xaçmaz, Yevlaxda 20 m/s, Abşeron yarımadasında və Abşeron dəniz rayonunda 27-32 m/s-dək güclənmiş, Neft Daşları stansiyasının məlumatına əsasən dalğanın hündürlüyü 6.5 metrə çatıb. 

Göygöldə 14 mm, Yardımlıda 12 mm, Daşkəsən, Altıağacda 11mm, Quba, Lerikdə 9 mm, Kəlvəzdə 7 mm, digər rayonlarda 0-6 mm, Bakıda və Abşeron yarımadasında 0.3-8 mm, Abşeron dəniz rayonunda 1-9 mm yağıntı qeydə alınıb. 

Qar örtüyünün hündürlüyü Qusar rayonunun Ləzə məntəqəsində 23 sm, Altıağacda (Xızı rayonu) 20 sm, Xaltan, Susay, Qonaqkənddə (Quba rayonu) 18 sm, Rvarudda (Lerik rayonu) 16 sm, Lerikdə 15 sm, Yardımlıda 13 sm, Kəlvəz, Rük, Quba, Qusarda 12 sm, Küpçal, Təngəaltı, Nohurdüzündə 10 sm, Daşkəsən, Göygöldə 7 sm, Qırız, Xınalıqda 5 sm, Gədəbəy, Mərəzədə 3 sm olub.

Dekabrın 4-də gecə havanın minimal temperaturu Bakıda və Abşeron yarımadasında 2-3, aran rayonlarında 0-5 dərəcə isti, dağlıq rayonlarda 7-10 dərəcə şaxta, Naxçıvan MR-da 4 dərəcə şaxtadan 1dərəcəyədək isti təşkil edib.-03D-