Azərbaycanda əsir olan Akop İciqulyan Ermənistana qayıdıb

Yerevan/ 02.10.14/Turan- Armİnfo: Bir il əvvəl Azərbaycan tərəfinə əsir düşən erməni hərbçi Akop İciqulyan oktyabrın 2-nə gecə Ermənistana qayıdıb.

O, Yerevan aeroportunda jurnalistlərə bildirib ki, əsirlikdən dərhal sonra Ermənistana qayıtmaqdan imtina etməyə məcbur idi, çünki “ona əsirlikdən azad olunma variantı kimi üçüncü ölkəni seçmək tapşırılmışdı, əks halda cəzalandırılacağı ilə hədələnirdi”.

İciqulyan deyib ki, Azərbaycanda əsirlikdə olarkən onu məcbur ediblər ki, Ermənistan-Azərbaycan sərhəddini bilərəkdən  keçməsi barədə müsahibə versin, ama əslində “bu, təsadüfən olub”. Onun sözlərinə görə, Qırmızı Xaç nümayəndələri ilə görüşdən əvvəl guya ona necə danışmaq barədə göstəriş verilib, əsirlikdən valideynlərinə göndərdiyi məktubun mətni diqtə edilib.

Bununla belə, İciqulyan özünü yaxşı hiss etdiyini bildirib, qalan 9 ay hərbi xidmətini davam etdirmək niyyətində olduğunu söyləyib.

İciqulyan 2013-cü il avqustun 8-də əsir düşüb. Bir ildən sonra üçüncü ölkəyə göndərilib və oradan Ermənstana qayıdıb.

Xatırladaq ki,  əsirlikdə olarkən verdiyi videomüsahibədə erməni ordusunda şəraitin pis olduğundan, zabitlərin əsgərlərə qarşı zorakılığından danışıb. Onun sözlərinə görə, zabitlər tərəfindən döyüldükdən və təhqirlərə məruz qaldıqdan sonra könüllü olaraq Azərbaycan tərəfinə keçib. -02D-