Azərbaycanda İnternet azadlığına hansı təhlükələr var?

Bu gün Park İnn otelinin “Natəvan” zalında “Onlayn İfadə Təşəbbüsü” (Expression Online Initiative) kampaniyasının təşkilatçılığı ilə “Azərbaycanda İnternet Azadlığı üçün Təhlükələr” mövzusunda tədbir keçirilib.

Təşkilatın koordinatoru Rəsul Cəfərov tədbirin ölkədə internet azadlığı sahəsində vəziyyətin qiymətləndirilməsi məqsədi ilə keçirildiyini və kampaniya çərçivəsində növbəti bir addım olduğunu qeyd edib.

Reportyorların Azadlıq və Təhlükəsizlik İnstitutunun rəhbəri Emin Hüseynov Rabitə Nazirliyinin Azərbaycanda əhalinin 65%-nin internet istifadəçisi olması haqqında statistikası ilə razı olmadığını bildirib. O, mobil telefon sahiblərini internet istifadəçiləri ilə bir tutan Rabitə Nazirliyinin düşüncəsini yanlış hesab edir.

O, həmçinin qeyd edib ki, Azərbaycanda internet xidmətlərinin qiymətləri, hətta qonşu Gürcüstan və Azərbaycanla müqayisədə belə, yüksək olaraq qalır.

Naxçıvanlı hüquq müdafiəçisi Elman Abbasov bildirib ki, bu regionda İnternet hakimiyyətin nəzarəti altındadır. Provayderlərin xidmətləri keyfiyyətsiz və bahalıdır. Uzaq kəndlərdə ümumiyyətlə internet yoxdur, internet klubları isə hakimiyyətin nəzarəti altındadır, xoşagəlməz saytlar bağlanır.

RATİ İnsan Hüquqları Klubu və İnternational Media Support təşkilatı ilə birlikdə bu ilin noyabrında Bakıda keçiriləcək İnternet İdarəçilik Forumu öncəsi internet sahəsində vəziyyəti araşdırmaq və müvafiq tövsiyələr hazırlamaq məqsədilə “Expression Online İniative” kampaniyasına başlayıblar. -26С04-