Osman Gündüz: Freedom House-un qiymətləndirmələri ədalətlidir

Freedom House ədalətli olaraq Azərbaycanı qismən-azad İnternet məkanı adlandırıb, İnformasiya Texnologiyaları Mərkəzinin prezidenti Osman Gündüz belə hesab edir.

O, obyektiv.tv-yə müsahibəsində qeyd edib ki, “şərtlərin sərtləşdirilməsi” təmayülü göz önündədir. Xüsusən, o, parlamentin qanunvericiliyə kommersiya təşkilatlarının təsisçiləri və nizamnamə kapitalındakı payları haqqında məlumatların əldə edilməsini məhdudlaşdıran düzəlişlər etdiyini xatırladıb. İndi bütün maliyyə və xəzinə təşkilatları bütün əhəmiyyətli məlumatları gizlədərək, bunu “kommersiya sirri” olması ilə izah edir.

Noyabrda Ümumdünya İnternet İdarəçilik Forumunu qəbul edəcək və özünü İKT sahəsində lider adlandıran ölkə onlayn-kontent senzurasını zəiflətməli, istifadəçilərin kimliyini müəyyən etmək üçün İnternet-kafelərdən istifadə etməməli, siyasi cəhətdən fəal İnternet istifadəçilərini saxta ittihamlarla həbs etməməlidir.

Eyni zamanda, Gündüz genişzolaqlı İnternetə azad çıxış və data-kartların istifadə zonasının genişləndirilməsi kimi müəyyən müsbət məqamları da qeyd edib. “Hazırda texniki vəziyyət yaxşılaşıb. Lakin rabitə vasitələri hökumət tərəfindən inhisara alınır. İndiyədək Azərbaycanda hökumət provayderləri var. Rabitə Nazirliyi bu günlərə qədər İnternet xidmətlərinin qiymətini yüksək saxlayırdı, özəl şirkətlərin bu qiymətləri azaltmasına imkan vermirdi. Bu siyasət yumşaldıqca istifadəçilərin sayı 1,5 dəfə artaraq, 4 milyona yaxınlaşıb, ekspert belə hesab edir. -17D-