Azərbaycanda parlament seçkiləri keçirilir

Bu gün Azərbaycanda  parlament seçkiləri keçirilir. Birpalatalı parlamentdə - Milli Məclisdə 125 yer uğrunda 767 namizəd mübarizə aparır.

286 nəfərin namizədliyi 15 siyasi partiya və “Azadlıq 2015” siyasi bloku tərəfindən irəli sürülüb. 481 nəfər müstəqil namizəddir və ya seçicilərin təşəbbüs qrupları tərəfindən irəli sürülüb. 5547 seçki məntəqəsində səsvermə hüququndan 5,2 mln. nəfərdən çox adam istifadə edə biləcək.

MSK-nın saat 10:00-a olan məlumatına görə, səsvermədə seçicilərin 12,8%-i iştirak edib.

Azərbaycan prezidenti İlham Əliyev ailə üzvləri ilə birlikdə Səbayel rayonundakı 6 saylı məktəbdə yerləşən məntəqədə səs verib.

Adəti üzrə səsvermədən sonra dövlət başçısı mətbuata açıqlama verməyib.

Müxalifətçi Milli Şura seçki kampaniyasında iştirakdan imtina edərək azad və ədalətli seçkilərin keçirilməsi üçün şəraitin olmadığına etirazını bildirib.

Müsavat Partiyası və NİDA hərəkatı da səsverməyə bir neçə gün qalmış eyni səbəbdən seçkilərdə iştirakdan imtina ediblər.

Seçki dairələrinin əksəriyyətində faktiki olaraq siyasi alternativ yoxdur.

Yalnız bir neçə dairədə REAL Hərəkatının, “Azadlıq 2015” blokunun və Ümid Partiyasının təmsilçiləri hakimiyyətyönlü namizədlərə real alternativdir. —06D-