Azərbaycanlı ağır atletlər bir il müddətinə beynəlxalq yarışlarda iştirakdan kənarlaşdırılıb

Bakı/21.10.17/Turan: Azərbaycandan və digər 8 ölkədən olan ağır atletlər bir il müddətinə beynəlxalq yarışlarda iştirakdan kənarlaşdırılıb. Bu qərar oktyabrın 20-də qüvvəyə minib. Bu barədə Beynəlxalq Ağır Atletika Federasiyasının (IWF) mətbuat xidməti məlumat yayıb.

IWF İcraiyyə Komitəsi diskvalifikasiya haqqında qərar qəbul edərkən 2008-ci ildə Pekində və 2012-ci ildə Londonda keçirilən Olimpiya oyunlarında beş azərbaycanlı ağırlıq qaldıranın dopinq testinin nəticələrinin müsbət olmasına əsaslanıb.

Azərbaycanla yanaşı Ermənistan, Belarus, Çin, Moldova, Qazaxıstan, Rusiya, Türkiyə və Ukrayna ağır atletləri də diskvalifikasiya ediliblər.

Əsasən həmin ölkələrin yığmaları noyabrın 28-dən dekabrın 5-dək ABŞ-da keçiriləcək Dünya Çempionatında iştirak etməyəcəklər.

Xatırladaq ki, Pekin olimpiadasının iştirakçıları Sərdar Həsənov (62 kq.), İntiqam Zahirov (85 kq.) və Nizami Paşayev (94 kq.), həmçinin Londonda çıxış edən Boyanka Kostova (68 kq.) və yenə də İntiqam Zahirovun (94 kq.) dopinq testinin nəticələri müsbət olub.-06D--