Azərbaycanlı məktəblilər ingilis dili üzrə beynəlxalq olimpiadada birincilik qazanıblar

Bakı/07.08.23/Turan: Azərbaycanlı məktəblilər Böyük Britaniyanın Brunel Universitetində keçirilən Teeneagle beynəlxalq ingilis dili olimpiadasının final mərhələsində birinci yeri tutublar.

Azərbaycandan 38 məktəbli olimpiadanın 3 kateqoriya üzrə yarışlarında iştirak ediblər. Həmin yarışlara 34 ölkədən 8-18 yaş arası məktəblilər qatılıb.

Teeneagle Azerbaijan təşkilatının rəhbəri Yaşar Zeynalovun sözlərinə görə, azərbaycanlı tələbələr dünyanın ən mühüm elmi mərkəzlərindən biri sayılan "Kembric Hall"da keçirilən mükafatlandırma mərasimində 12 qızıl, 14 gümüş və 12 bürünc medal qazanıblar. Beləliklə, medalların ümumi sayına görə azərbaycanlı tələbələr dünya üzrə birinci olublar.

Bundan əlavə, 3 məktəblimiz ən yüksək nəticə göstərərək 1 qızıl və 2 gümüş kubok qazanıb. Qızıl kuboku 189-190 saylı orta məktəbin 8-ci sinif şagirdi Nigar Quliyeva qazanıb.

Qeyd edək ki, TeenEagle beynəlxalq İngilis dili olimpiadasının seçmə turları dekabr, fevral və mart aylarında onlayn keçirilib və 3 mərhələdən ibarət olub. Qlobal final dörd əsas yarışdan ibarət olub: biliyin yoxlanması, yazı yarışması, lüğət ehtiyatı və şifahi nitq.

Azərbaycanlı məktəblilər Azərbaycan mədəniyyətini də layiqincə təmsil ediblər. Onlar milli rəqsləri və mahnıları ifa edərək olimpiada çərçivəsində təşkil olunmuş istedadlar yarışında birinci yeri tutublar. 06B