Beynəlxalq Qırmızı Xaç Komitəsi Qubad İbadoğlunun səhhətinin ağır olması barədə məlumatlandırılıb

Bakı/07.08.23/Turan:  Azərbaycan Demokratiya və Rifah Partiyasının sədri, həbsdə olan Qubad İbadoğlunun qardaşı Qalib Bayramov bu gün Beynəlxalq Qırmızı Xaç Komitəsinin Bakı ofisinin saxlanma yerləri üzrə nümayəndəsilə görüşüb. Bu barədə Turan-a Bayramov özü bildirib.

O, Komitə nümayəndəsinə İbadoğlunun saxlanma şəraiti, həmçinin səhhəti barədə məlumat verib.

“Mən dedim ki, biz Qubad İbadoğlunun səhhətinin kəskin pisləşməsindən çox narahatıq. Qırmızı Xaçdan öz  mandatı çərçivəsində  müdaxilə etməyi xahiş etdim. Komitə nümayəndəsi müəyyən qeydlər etdi. Bizim müraciətimiz Qırmızı Xaçda qeydə alındı. Görünür, onlar sabahdan hərəkətə keçəcəklər", - Bayramov deyib.

Onun sözlərinə görə, İbadoğlunun vəziyyəti getdikcə pisləşir.

"Qanda şəkərin səviyyəsi heç cür normaya düşmür. Arterial təzyiqdə kəskin sıçrayışlar var. Bundan əlavə, ürək problemləri kəskinləşib. Aorta kritik səviyyəyə qədər genişlənib. Qanda şəkərin yüksək səviyyəsi digər orqanların işinə mənfi təsir göstərməyə başlayıb, görmə qabiliyyəti pisləşib, böyrəklərdə problemlər yaranıb. Penitensiar Xidmətin dəvət etdiyi həkimlər bütün bunları qeydə alıblar. Bəlkə başqa problemlər də var, bizdən gizlədirlər", - Bayramov deyib.

Onun sözlərinə görə, havalandırılmayan kamerada saxlanması siyasətçinin səhhətinə mənfi təsir göstərir.

Qubad İbadoğluna ailə üzvlərilə görüş verilmir ki, bu da psixoloji təzyiqdir.

* Xatırladaq ki, Azərbaycan Demokratiya və Rifah Partiyasının rəhbəri Qubad İbadoğlu iyulun 23-də günorta saxlanılıb. Bazar ertəsi ona qarşı Azərbaycan Cinayət Məcəlləsinin 204 .3.1-ci maddəsilə (mütəşəkkil dəstə tərəfindən satış məqsədi ilə saxta pul, qiymətli dövlət kağızları və ya xarici valyuta, yaxud xarici valyutada ifadə olunan qiymətli kağızları hazırlama, habelə əldə etmə və ya satma) ittiham irəli sürülüb.

Bu maddə üzrə onu 8 ildən 12 ilədək həbs təhlükəsi gözləyir. İyulun 24-də məhkəmə istintaq müddətində onu 4 ay həbs edib. Hüquq-müdafiə təşkilatları İbadoğluya qarşı təqibləri pisləyiblər və onun azad olunmasını tələb ediblər.

Hüquq müdafiəçiləri onu siyasi məhbus kimi tanıyıblar.

İyulun 28-də Apellyasiya Məhkəməsi İbadoğlunun həbsi barədə qərarı qüvvədə saxlayıb.

**İyulda İbadoğlu Milli Şuranın rəhbəri, professor Cəmil Həsənli və Avropada siyasi mühacirətdə olan diplomat Arif Məmmədovla birlikdə Azərbaycan gənclərinin təhsil fondunun yaradıldığını bildirib. Fond Londonda qeydiyyatdan keçib.

Qubad İbadoğlu xaricdəki azərbaycanlı məmurların əmlakının müsadirə edilməsi və həmin vəsaitlərin bu fonda köçürülməsi təşəbbüsü ilə çıxış edib. 06B