Azərsun Sənaye Parkında baş verən yanğın cümə günü səhər saatlarında söndürülüb /YENİLƏNİB/

Bakı/29.04.22/Turan: Bütün gecəni yanğınla mübarizə aparan yanğınsöndürmə briqadalarının səyi ilə səhər saat 8.24-də Sumqayıt şəhəri yaxınlığında, Azərsun Sənaye Parkında baş verən güclü yanğın söndürülüb.

Bu barədə Fövqəladə Hallar Nazirliyi  məlumat yayıb.

Son məlumatlara görə, yanğın 5 hektar ərazini əhatə edib, orada yerləşən mal və avadanlıqlar yanıb. Tam olaraq nəyin yandığı barədə məlumat verilmir.

Parkdakı konstruksiyaların sökülməsi istiqamətində işlər aparılır. Yanğın nəticəsində tələfat olmayıb.

Fövqəladə Hallar Nazirliyi və prokurorluq orqanları yanğının başvermə səbəblərini araşdırır. -02D-

*   *   *

2022 Aprel 28 (Cümə axşamı) 22:18:02

Saat 22:00-a olan məlumata görə, Sumqayıtda yanğın davam edir /YENİLƏNİB/

Fövqəladə Hallar Nazirliyinin rəisi Kəmaləddin Heydərov Sumqayıt şəhərində “Azərsun” Sənaye Parkının ərazisində baş verən yanğın yerinə gəlib.

Fövqəladə Hallar Nazirliyinin saat 22:00-a olan məlumatına görə, yanğınla mübarizə davam edir. Geniş ərazini əhatə edən yanğının qarşısının alınması istiqamətində tədbirlər davam etdirilir.-0-

*   *   *

2022 Aprel 28 (Cümə axşamı) 20:30:25

Sumqayıt Sənaye Parkında güclü yanğı

Bakı/28.04.22/Turan: Cümə axşamı axşam saatlarında Bakıdan  Sumqayıt şəhərində Azərsun Sənaye Parkının ərazisində güclü yanğın baş verib.

Fövqəladə Hallar Nazirliyindən verilən məlumata görə, yanğının söndürülməsində iki helikopter və çoxlu sayda yanğınsöndürmə briqadaları iştirak edir. Ölən və yaralananlar barədə məlumat verilmir.

Qeyri-rəsmi məlumatlara görə, yanğın bir hektardan çox ərazini əhatə edib. Konkret nəyin yandıgı barədə də məlumat verilmir. -0-