Bakı Karqo Terminalında külli miqdarda psixotrop maddə aşkar edilib

Bakı/09.10.23/Turan: Hava Nəqliyyatında Baş Gömrük İdarəsinin Bakı Karqo Terminalında beynəlxalq sürətli poçtdaşıma şirkəti vasitəsilə Azərbaycandan Yeni Zellandiyaya göndərilən poçt bağlamasına baxış keçirilib. Bu barədə Dövlət Gömrük Komitəsinin (DGK) Mətbuat və İctimaiyyətlə Əlaqələr İdarəsinin məlumatında deyilir.

Keçirilmiş baxış zamanı gömrük nəzarətindən gizlədilən 3 ədəd bükümdə külli miqdarda, 1000,98 qram metamfetamin psixotrop maddəsi aşkar edilib.

Faktla bağlı Əməliyyat-İstintaq Baş İdarəsində Azərbaycan Cinayət Məcəlləsinin 206.3.2 (Qaçaqmalçılıq), 234.4.1, 234.4.3-cü (Qanunsuz olaraq psixotrop maddələri əldə etmə, saxlama) maddələri ilə cinayət işi başlanıb.

Aparılmış istintaq zamanı qeyd edilən cinayəti törətmiş şəxsin müəyyən edilərək cinayət məsuliyyətinə cəlb olunduğu və barəsində məhkəmə qərarı ilə həbs qətimkan tədbiri seçildiyi bildirilir.

Məlumata görə, hazırda cinayət işinin istintaqı davam etdirilir. 0