Bakı meri və baş nazir evləri sökülən sakinlərin tələblərini dinləyiblər

Çərşənbə axşamı Yasamal rayonundakı 150 saylı məktəbdə paytaxt meri Hacıbala Abutalıbov və baş nazirin müavini Abid Şərifl keçmiş  Sovetski küçəsində və ona bitişik məhəllələrdə yaşayan sakinlərlə görüşüb. 

Bu ərazidəki evlər sökülür. Lakin sakinlər verilən kompensasiyanın həcmindən razı deyil və adekvat kompensasiya tələbilə etiraz aksiyası keçirməyə hazırlaşırlar.

“Biz hər kvadrat metrə görə 3,5-4 min manat və ya yaxınlıqda buna bərabər mənzilin verilməsini istəyirik, biz şəhər kənarına getmək istəmirik”, - sakinlərdən biri Turan-ın müxbirinə bildirib. O həmçinin qeyd edib ki, elə ailələr var ki, mənzili 12 kv. metrdir, bu cür ailələr ailə üzvlərinin sayı nəzərə alınmaqla hazır mənzillər almalıdır.

“Biz öz tələblərimizi irəli sürdük və bildirdik ki, öz mənzilimizi 1500 manata vermək istəmirik. Baş nazir və paytaxt meri tələblərimizə baxmaq üçün 1 həftə vaxt istəyiblər, bundan sonra cavab verəcəklər”, - digər  sakin bildirib.

Qeyd edək ki, görüş keçirilən yerə 2 minə yaxın adam toplaşıb.

Ötən bazar günü 5 minə yaxın yerli sakin kompensasiyanın azlığına etiraz edərək etiraz aksiyası keçirib. Sakinlər bildiriblər ki, əgər hakimiyyət onların tələblərini yerinə yetirməsə daha sərt tədbirlərə əl atacaqlar. -02В-