Bakıda 13 yaşlı qız ana olub

Bakı/07.09.22/Turan: Bakıda 13 yaşlı qız ev şəraitində uşaq dünyaya gətirib. Bu barədə Uşaqlar Birliyinin sədri Kəmalə Ağazadə məlumat verib. Onun sözlərinə görə, qız xəstəxanaya yerləşdirilib.

"Gənc qızın anası onun sığınacağa yerləşdirilməsini xahiş edib. O deyib ki, uşaq təcavüz nəticəsində doğulub", - Ağazadə deyib.

TƏBİB-dən Turan-a bildiriblər ki, sentyabrın 6-da saat 13:30-da Sabunçu rayonunda ev şəraitində doğuşla  bağlı Bakı Şəhəri Təcili və Təxirəsalınmaz Tibbi Yardım Stansiyasına çağırış daxil olub.

“Təcili tibbi yardım briqadası tərəfindən anaya 2009-cu ildə anadan olub)  yardım göstərilib. Sonra ana və yeni doğulmuş oğlan uşağı Elmi-Tədqiqat Mamalıq və Ginekologiya İnstitutuna aparılıb", - qurumdan bildiriblər.

Hazırda ana və uşağın vəziyyəti stabildir, tibb müəssisəsində müalicələri davam edir. Uşağın çəkisi 3 600 qramdır.

Daxili İşlər Nazirliyinin mətbuat xidmətinin şöbə rəisi Elşad Hacıyev bildirib ki, faktla bağlı Sabunçu Rayon Polis İdarəsi və rayon prokurorluğu tərəfindən araşdırma aparılır. Təfərrüatlar barədə ictimaiyyətə məlumat veriləcək.

Ailə,Qadın və Uşaq Problemləri üzrə Dövlət Komitəsi bildirib ki, qurumun əməkdaşları psixoloqun iştirakı ilə tibb müəssisəsində olub, yetkinlik yaşına çatmayan qızın vəziyyətilə maraqlanıblar. Azyaşlı ananın və körpənin sonrakı taleyi Komitə və aidiyyatı qurumlar tərəfindən nəzarətə götürülüb, müvafiq tədbirlər görülür. 16D06