Bakıda Breyviksayağı qətl

İyulun 17-də Bakıda sərnişin avtobusunda baş vermiş silahlı insidentlə bağlı prokurorluq bəyanat yayıb. Bəyanatda deyilir ki, insident saat 13:20-də Bakıxanov   küçəsində baş verib. 6 saylı avtobusun salonunda olan Bakı sakini Anar Xəlilov lüləsi kəsik ov tüfəngindən atəş açaraq Vəfadar Məmmədovu öldürüb. 

“İlkin məlumata görə, A.Xəlilov əvvəllər ruhi əsəb xəstəxanasında müalicə olunub və orada qeydiyyatdadır”, - məlumatda deyilir. 

A.Xəlilovun avtomobilinə baxış zamanı onun yük hissəsində  “Vinçester” markalı ov silahı, lüləsi kəsilmiş 12 çaplı yivsiz qoşalülə ov silahı, 12 və 20 çaplı patronlar götürülüb.

Fakt üzrə CM-in 228.1 (qanunsuz odlu silah, onun komplekt hissələrini, döyüş sursatı, partlayıcı maddələri əldə etmə, saxlama, gəzdirmə), 229.1 (qanunsuz silah hazırlama) və 120.2.4-cü (ümumi təhlükəli üsulla qəsdən adam öldürmə) maddələri ilə cinayət işi başlanıb. İstintaqı Bakı Şəhər Prokurorluğu aparır. 

Lakin prokurorluq ruhi xəstə olan şəxsin hansı yolla xeyli silah əldə etdiyini və avtomobilində saxladığını açıqlamır. Həmçinin qətlin səbəbləri məlum deyil: şəxsi münasibətlər zəminində baş verib, yoxsa Breyviki təqlid etmək olub. -16D-