Baş Mütəşəkkil Cinayətkarlıqla Mübarizə İdarəsi AXCP nümayəndələrinə də xəbərdarlıq edib

Oktyabrın 14-də  AXCP sədrinin müavini Gözəl Bayramlı və  AXCP Ali Məclisinin sədri Nurəddin Məmmədli Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə çağırılıblar. Onlara xəbərdarlıq edilib. Bu barədə Turan-a onların özləri bildiriblər.

İdarədə adı çəkilən şəxslərə ayrılıqda Facebook statuslarında, şərh və yazılarında dini eksremizmi dəstəkləmək, “Nardaran işi” üzrə həbs olunanları müdafiə etmək və dövlət quruluşu əleyhinə çağırış məqamlarının olduğunun narahatlıq doğurduğu bildirilib. Onlara belə status və yazıları yazmamaq tövsiyə edilib.   

AXCP sədrinin müavini Gözəl Bayramlı deyib ki, “Nardaran işi”ndə, “Müsəlman Birliyi” Hərəkatının rəhbəri Taleh Bağırzadə və AXCP sədrinin müavini Fuad  Qəhrəmanlının hərəkətlərində dövlət quruluşu əleyhinə fəaliyyət yoxdur.

“Onların mənim yazılarımda dini ekstremizmə və dövlət əleyhinə çağırış olması ilə bağlı  xəbərdarlığı ilə razılaşmadım. Dedim ki, dövlət əleyhinə deyil, bu rejimin apardığı siyasətin əleyhinə mübarizə aparıram və bundan sonra da mübarizəmi davam etdirəcəm”, - G.Bayramlı bildirib.

AXCP Ali Məclisinin sədri Nurəddin Məmmədli də tənqidi Facebook statusları və “Nardaran işi” ilə bağlı məhkəmədə iştirakı barədə  xəbərdarlıq alıb.

“Onlara dedim ki, mən dinc yolla mübarizəni dəstəkləyirəm və  bundan sonra da dəstəkləyəcəm. Yazılarım və statuslarlım isə  analitik məzmun daşıyır, dini ekstremizmə və dövlət quruluşu əleyhinə çağırışlar yoxdur”, -N.Məmmədli qeyd edib.   

N.Məmmədli hesab edir ki, onların polisə çağırılmasında məqsəd heç də “Nardaran işi” ilə bağlı dərc edilmiş yazılar deyil.

“Hakimiyyət AXCP-nin guya dini eksremist qruplarla əlaqədə olması mifini yaratmaq istəyir”, - o vurğulayıb.-03B-