Baş Prokurorluğun Əfqan Muxtarlı haqqında fantastik hekayəsi

Bakı/01.06.17/Turan: Azərbaycanlı jurnalist Əfqan Muxtarlının saxlanmasından üç gün sonra ölkənin Baş Prokurorluğu və Dövlət Sərhəd Xidməti birgə məlumat yayıb.

Press-relizə əsasən, "Muxtarlı 29 may 2017-ci il tarixdə saat 22:40-da Balakən rayonu ərazisində Azərbaycanın mühafizə olunan dövlət sərhədini üzərində şəxsiyyətini təsdiq edən sənəd olmadan nəzarət-buraxılış məntəqələrindən kənarda Gürcüstandan Azərbaycana qanunsuz olaraq keçdikdən sonra qaçmağa cəhd edərkən Dövlət Sərhəd Xidmətinin əməkdaşlarının qanuni tələbinə tabe olmayaraq onlara qarşı həyat və sağlamlıq üçün təhlükəli olan zor tətbiq etməklə müqavimət göstərib".

Prokurorluğun və Sərhəd Xidmətinin versiyasına görə, Muxtarlının üzərindən 10 min avro məbləğində nağd pul, "Bank of Georgia ekspress" plastik kartı və digər əşyalar aşkar edilərək götürülüb.

Muxtarlı şübhəli şəxs qismində saxlanılıb və mayın 30-da ona qarşı Cinayət Məcəlləsinin 318.1 (Azərbaycan Respublikasının dövlət sərhədini qanunsuz olaraq keçmə) və 206.1-ci (Qaçaqmalçılıq) maddələri ilə cinayət işi başlanıb, deyə məlumatda qeyd edilir.

Hüquq-mühafizə orqanlarının versiyası fantastik görünür: belə çıxır ki, Azərbaycandan qaçan Muxtarlı birdən hakimiyyətyönlü KİV-in ona qarşı ləkəyaxma kampaniyası apardığı ölkəyə qayıtmaq qərarına gəlib.

Tbilisidə Azərbaycan xüsusi xidmətlərinin casusları onu izlədiyi bir vaxtda Muxtarlı pasportu olmadan dövlət sərhədini pozmağa cürət edir, amma üzərində 10 min avro ilə və sərhədçilərlə "döyüşərək" (!).

Amma bütün bu cəfəngiyyat Gürcüstan nümayəndələri, şahidlər və beynəlxalq təşkilatlar tərəfindən təkzib edilir, onlar Muxtarının Tbilisidə oğurlanmasına şübhə etmirlər və Gürcüstan hakimiyyətindən cavab və jurnalistin azad edilməsini tələb edirlər. -06D-