Baş Prokurorluq Rasim Əliyevin ölüm işi üzrə təhqiqatın tezliklə başa çatacağını bildirib

  Azərbaycan Baş Prokurorluğu jurnalist Rasim Əliyevin ölüm işi üzrə ekspertizanın nəticələrinin alındığını bildirib.

Qeyd olunur ki, oktyabrın 20-də məhkəmə-tibbi ekspertizanın rəyi də daxil olmaqla, ekspertizanın nəticələri alınıb.

“Hazırda müttəhimlərin ekspertizanın nəticələri ilə tanışlığı prosesi davam edir. Yaxın vaxtlarda təhqiqat başa çatdırılacaq, mərhumun qanuni nümayəndəsi ekspertizanın rəyi və digər cinayət materialları ilə tanış ola bilər”, - məlumatda deyilir.

Baş prokurorluğun bəyanatı R.Əliyevin valideynlərinin prezident İlham Əliyevə müraciətindən dərhal sonra səslənib. Belə ki, valideynlər istintaqın yubadılmasından, tibbi ekspertizanın rəyinin olmamasından dövlət başçısına şikayət ediblər.

Jurnalistin ölümündən sonra dövlət başçısı təhqiqatı şəxsi nəzarətinə götürdüyünü bildirib.

Reportyorların Azadlıq və Təhlükəsizlik İnstitutunun reportyoru Rasim Əliyev avqustun 9-da 1 saylı Kliniki Xəstəxanada vəfat edib.  Avqustun 8-də “Qəbələ” futbol klubunun kapitanı Cavid Hüseynovun bir qrup tərəfdaşı onu döyüb. Ölümdən öncə R.Əliyev bildirib ki, döyülməsinə futbolçunun ədəbsiz hərəkətini tənqid etməsi səbəb ola bilər.—0—