Bazar günü Azərbaycanda havanın temperaturu müsbət 42 dərəcəyə yüksələcək

Bakı/08.07.23/Turan: İyulun 9-da Bakıda və Abşeronda günəşli hava gözlənilir, şimal-şərq küləyi üstünlük təşkil edəcək.

Havanın temperaturu gecə müsbət 22 +27, gündüz müsbət 35 +39, bəzi yerlərdə müsbət 41 dərəcə olacaq, Milli Hidrometeorologiya xidməti bildirib.

Abşeron yarımadasının çimərliklərində əsasən şimal-şərq küləyi əsəcək.

Şimal çimərliklərində (Sumqayıt, Novxanı, Pirşağı, Nardaran, Bilgəh, Zaqulba) dəniz suyunun temperaturu müsbət 26 +27, cənub çimərliklərində (Türkan, Hövsan, Sahil, Şıx)  müsbət 28 +29 dərəcə olacaq.

Azərbaycanın rayonlarında da hava əsasən yağıntısız olacaq. Lakin bəzi şimal və qərb rayonlarında leysan, şimşək, dolu və duman gözlənilir. Gündüz şərq küləyi vaxtaşırı güclənəcək. Havanın temperaturu gecə müsbət 21 +26, gündüz müsbət 35 +40, bəzi yerlərdə  müsbət 42 dərəcə olacaq. Dağlarda gecə müsbət 13-18, gündüz müsbət 23-28 dərəcə olacaq.

Qeyd edək ki, bundan öncə sinoptiklər gələn həftənin əvvəlində - iyulun 10-11-də Bakıda və Abşeronda küləkli hava şəraitini proqnozlaşdırıblar. Şimal-qərb küləyinin sürəti saniyədə 15-20 metrə çatacaq, bəzi yerlərdə saniyədə 23-25 metrədək güclənəcək.

Bəzi rayonlarda artıq bu gündən küləyin sürətinin artacağı gözlənilir. 06B