Bəxtiyar Hacıyev aclığa başlayıb

Bakı/06.10.23/Turan: Həbsdə olan ictimai fəal və hüquq müdafiəçisi Bəxtiyar Hacıyev müddətsiz aclıq elan edib. Bu barədə Turan-a onun vəkili Elçin Sadıqov bildirib.

Onun sözlərinə görə, Hacıyev həbs müddətinin qanunsuz uzadılmasına etiraz olaraq oktyabrın 2-dən aclıq edir.

"Səhhəti pisləşib. Beşgünlük aclıq aksiyası zamanı həkim iki dəfə ona baş çəkib", - o deyib.

Onun sözlərinə görə, Hacıyev bildirib ki, həbs müddətinin uzadılması barədə qərar ləğv olunana qədər aclığı davam etdirəcək.

Lakin Bakı Apellyasiya Məhkəməsi həbs müddətinin uzadılması barədə şikayəti rədd edib.

Vəkil həmçinin bildirib ki, Hacıyev məcburi qaydada məhkəməyə aparılıb.

“Çeçələ barmağında və qollarında qançırlar var. Bu izlər onu zorla məhkəməməyə aparırkən əmələ gəlib. O, qabaqcadan məhkəmədə iştirak etməyəcəyi barədə  ərizə yazıb. Buna baxmayaraq, onu zorla məhkəməyə aparıblar", - vəkil deyib.

Oktyabrın 2-də Xətai Rayon Məhkəməsi Hacıyevin həbs müddətini daha 3 ay uzadıb. Müdafiə tərəfi bu qərarı qanunsuz hesab edib.

Bu fikri hüquq müdafiəçisi, "Müdafiə xətti" təşkilatının direktoru Rüfət Səfərov da bölüşür.

Onun sözlərinə görə, Hacıyev əvvəlcə daha az ağır cinayətdə, sonra isə ağır cinayətlərdə ittiham olunub.

Cinayət Prosessual Məcəllənin 218.10.3-cü maddəsinə əsasən ağır cinayətin törədilməsində ittiham üzrə ibtidai istintaq hər bir halda 13 aydan çox olmayan müddətdə qurtarmalıdır. Bu müddət 28 oktyabr 2023-cü ildə bitir.

 Baş prokuror istintaq müddətinin 16 ayadək, yəni 28 yanvar 2024-cü ilədək uzadılması barədə təqdimat verib, Səfərov deyib. Digər tərəfdən, cinayət işinin məhkəməyədək icraatı zamanı təqsirləndirilən şəxsin həbsdə saxlanılmasının son müddəti 13 aydır. Bəxtiyar Hacıyev 9 dekabr 2022-ci il tarixdə həbs edilib. Göründüyü kimi, cinayət-prosessual qanunvericiliyi tam istisna etdiyi halda Hacıyev ən azı nöbəti ilin yanvarınadək həbsdə qalacaq.

"Bütün bunlar bir daha təsdiqləyir ki, Hacıyevə qarşı iş hüquqi proses deyil. O, siyasi girovdur", - Səfərov qeyd edib.

* 2022-ci il dekabrın 9-da Bəxtiyar Hacıyev xuliqanlıq və məhkəməyə hörmətsizlik ittihamı ilə saxlanılıb.

Dekabrın 15-də Hacıyev həbsdən azad olunması tələbilə aclıq elan edib. İctimaiyyət nümayəndələrinin və ailə üzvlərinin təkidli çağırışlarından sonra dekabrın 28-də aclığı dayandırıb. Lakin Apellyasiya Məhkəməsi onun həbsilə bağlı şikayətini təmin etmədikdən sonra, yanvarın 9-da Bəxtiyar Hacıyev yenidən aclığa başlayıb və aclığın 51-ci günündə onu dayandırıb.

Bu il iyunun 16-da istintaq orqanı Bəxtiyar Hacıyevə qarşı Cinayət Məcəlləsinin 192-ci (qanunsuz sahibkarlıq), 193-cü (yalançı sahibkarlıq), 320.1-ci (hüquq verən və ya vəzifədən azad edən vəsiqəni və ya digər rəsmi sənədi istifadə etmək məqsədi ilə saxtalaşdırma), 320.2-ci (bilə-bilə saxta sənədlərdən istifadə etmə), 206.1-ci (qaçaqmalçılıq) maddələrilə yeni ittihamlar irəli sürüb.

Yeni ittihamlar Bəxtiyar Hacıyevin qrant aldığı və təyinatı üzrə xərcləmədiyi iddiasına əsaslanır.

ABŞ Dövlət Departamenti, ABŞ Helsinki Komissiyası, Avropa İttifaqı, Avropa Şurası və bir sıra beynəlxalq qeyri-hökumət təşkilatlarının nümayəndələri Bəxtiyar Hacıyevin həbsdən azad olunmasını tələb ediblər.-03D06-