Bəxtiyar Hacıyevə qarşı qeyri-insani rəftar. Ölkə qanunları, yoxsa mafiya qaydaları? – Bəşir Süleymanlı saat 16:00-da “Çətin sual` qarşısında

Bakı/25.04.22/Turan: İctimai fəal Bəxtiyar Hacıyev naməlum şəxslər tərəfindən oğurlanması və döyülməsi ictimaiyyət arasında geniş müzakirə olunur və bu əməli törədənlər birmənalı şəkildə qınanılır.

Hacıyev aprelin 23-də facebook səhifəsində yazmışdı ki, aprelin 21-də saat 23 radələrində evə getmək üçün M.Naxçıvani və Z.Əhmədbəyov küçələrinin kəsişməsində avtomobilinə yaxınlaşanda zibil qablarının arasından bir nəfər üstünə hücum çəkib. Bu anda 4 nəfər qara maskalı şəxs onu zorla maşına əyləşdirərək, başına qara torba keçirərək naməlum istiqamətdə aparıblar". Onun əllərini, gözlərini bağlayıblar, qulağına qulaqlıq taxıblar.

"Tələb etdilər ki, Vilayət Eyvazovla bağlı tənqidi postlarımı kimin tapşırığı ilə yazdığımı deyim. Mən heç kimdən tapşırıq almadığımı deyəndə paltarımı çıxarıb, nalayiq davranışlarla tələb etdilər ki, Vilayət Eyvazov və Fuad Muradov (hökumətyönlü fəal) ilə bağlı postlarımı silim". Hacıyevin sözlərinə görə, onun üzərinə sidik ifraz ediblər və bütün baş verənləri kameraya çəkiblər.

"Nazirlə bağlı tənqidlərimi davam etdirəcəyim təqdirdə məni zorlamaq, öldürməklə bağlı xəbərdarlıq etdilər. Bundan sonra yenə gözlərimi bağlayıb, gətirdilər naməlum bir yerə", deyə Hacıyev bildirib.

Bir müddət sonra onu qaranlıq, düzənlik bir yerdə gözləri və əlləri arxadan yapışqan lentlə bağlı şəkildə sonradan Ramana qəsəbəsi olduğunu öyrəndiyi ərazidə maşından düşürüblər. Hacıyev hesab edir ki, ona qarşı bu murdar cinayəti törədən şəxslər tapılıb cəzalandırılmasa, bunun məsuliyyəti DİN başçısına aid olacaq.

Bəxtiyar Hacıyev Daxili İşlər Nazirliyində qəbul edilib. Daxili işlər naziri, general-polkovnik Vilayət Eyvazov onu dinləyib, onun qaldırdığı məsələlərlə bağlı müvafiq araşdırmaların aparılacağı nəzərinə çatdırılıb. Bu barədə DİN mətbuat xidmətinin şöbə müdiri Elşad Hacıyev bildirib.

Vətəndaş Hüquqları İnstitutunun rəhbəri Bəşir Süleymanlı Kamran Mahmudovun təqdimatında yayımlanan “Çətin sual” verilişində baş verənlərə münasibət bildirir.