Milli Şura fəallara qarşı repressiyaları qınayır

Bakı/25.04.22/Turan: Demokratik Qüvvələrin Milli Şurası (DQMŞ) ictimai-siyasi fəal Bəxtiyar Hacıyev oğurlanmasını qınayıb. 

DQMŞ-nin bəyanatında deyilir: "Bəxtiyar Hacıyev aprelin 21-də faktiki oğurlanaraq naməlum yerə aparılıb və orada daxili işlər naziri Vilayət Eyvazov haqqında tənqidi yazılarına görə hədələnib, təhqirə və alçaldıcı rəftara məruz qalıb. Ona təzyiq edərək, sosial şəbəkə hesabından İlham Əliyevi və Vilayət Eyvazovu tənqid edən bir neçə yazısını sildiriblər. Hacıyev başına gələnlərlə bağlı ictimaiyyətə geniş açıqlama verib.

Milli Şura Hacıyevə qarşı törədilən bu cinayəti qətiyyətlə pisləyir və onu törədənlərin qanunla cəzalandırılmasını tələb edir. Hərçənd, Milli Şura bu cinayətin də siyasi hakimiyyətin sifarişi və ya razılığı ilə törədildiyinə və bu səbəbdən ört-basdır ediləcəyinə əmindir.

Milli Şura xatırladır ki, Hacıyev artıq uzun zamandır rejimin mənəvi-fiziki təzyiqi ilə üz-üzədir. Buna qədər o, ən ağır formalarda mənəvi terrora, hüquq-mühafizə orqanlarının təhdid və təzyiqlərinə, hətta Bakı Şəhər Baş Polis İdarəsində fiziki zorakılığa da məruz qalıb. Bütün bunlar Hacıyevin fəal vətəndaş mövqeyində duraraq, hakimiyyətin xalqa zidd fəaliyyətini davamlı və sistemli şəkildə tənqid etməsinə görədir və rejimin öz tənqidçilərinə, prinsipial müxalif qüvvələrə qarşı yürütdüyü repressiv siyasətin tərkib hissəsidir.

Cəmiyyəti repressiya və zorakılıqla təzyiq alıtnda saxlamaq hakim rejim üçün çoxdan dövlət siyasətinə çevrilib və davamlı tətbiq olunmaqdadır. Hüquq müdafiəçisi və rejimin prinsipial tənqidçilərindən biri Rüfət Səfərovun bugünlərdə növbəti dəfə polis zorakılığına məruz qalması da elə bunun göstəricisidir. Rüfət Səfərov VİP sədri Əli Əliyevin apellyasiya məhkəməsini izləmək istəyərkən polis əməkdaşları ona mane olub, hüquq müdafiəçisi buna etiraz etdikdə isə onu döyüblər və zorla polis bölməsinə aparıblar.

Ötən dövrdə AXCP fəallarına təzyiqlər - onların həbsi, zorakılığa məruz qalması, toplantılarının dağıdılması və s. də səngiməyib. Hakim rejim xaricdən readmissiya olunan ictimai-siyasi fəalların həbsini də onları təqib etməyəcəyi haqda üzərinə götürdüyü öhdəliyi pozaraq, davam etdirir. Bugünlərdə Almaniyadan readmissiya olunan fəal Samir Aşurov da ondan əvvəl eyni ölkədən Azərbaycana geri göndərilən fəallar Malik Rzayev, Mütəllim Orucov, Cəfər Mirzəyev və Pünhan Kərimli kimi saxta ittihamla həbs edilib.

Təəssüf ki, hakimiyyət çox vaxt olduğu kimi, yenə də dünyada gedən prosesləri düzgün qavraya və qiymətləndirə bilmir. Hazırda dünya ictimaiyyətinin əsas diqqətinin Rusiyanın Ukraynaya hərbi təcavüzünə yönəldiyini görərək hesab edir ki, ölkədə repressiv mühiti qoruyub saxlamaq və hətta gücləndirmək üçün fürsət yaranıb. Hakim rejim özünün siyasi hamisi olan Putin rejiminin Ukrayna ilə müharibə zəmnində çökməkdə olduğunu və bu prosesin sonda bütün avtoritar sistemləri, ailə-klan hakimiyyətlərini, o cümlədən onun özünü çökdürəcəyini hiss edir, bu səbəbdən də Azərbaycan cəmiyyətində qorxu və ümidsizliyi gücləndirmək istəyir.

Milli Şura bəyan edir ki, hakimiyyətin onu gözləyən labüd çöküşdən qaçmaq istəyi ilə repressiya və təzyiqlərə güc verməsi əbəsdir, bununla o, böyük bir tarixi prosesi durdura bilməz, amma xalqın ona olan hiddət və qəzəbini atırar.

Milli Şura Azərbaycandakı repressiv və zorakı siyasətə görə birbaşa İlham Əliyevin məsuliyyət daşıdığını bir daha bəyan edir. Məhz onun iradəsi ilə dövlət orqanları konstitusion funksiyalarından kənara çıxaraq xalqa qarşı cəza mexanizmlərinə çevrilib. Lakin bu ümumi repressiya maşınının vintləri də məsuliyyətdən yayına bilməyəcəklərini, indi icra etdikəri qanunsuz əməllərə görə bir gün mütləq cəza alacaqlarını bilməlidirlər.

Milli Şura təəssüflə qeyd edir ki, Azərbaycandakı avtoritar ailə hakimiyyətinin bu qədər azğınlaşmasına görə beynəlxalq birlik də özünün kəsərsiz mövqeyi ilə ciddi məsuliyyət daşıyır. Bu hakimiyyətin öz opponentlərinə qarşı fiziki zorkılığına dair indiyədək onlarla faktlar aşkarlanıb. Milli Şuranın 19 oktyabr 2019-cu il mitinqi zamanı Milli Şura rəhbərliyindən AXCP sədri Əli Kərimli, Tofiq Yaqublu, mərhum İbrahim İbrahimli başda olmaqla, onlarla fəal polisin ağır işgəncələrinə məruz qalmışdı. Buna qədər Nardaran əməliyyatında həbs edilən inanclı insanların, Tərtər işinə görə həbs edilən hərbçilərin, bloger Mehman Hüseynovun, AXCP fəalları Saleh Rüstəmlinin, Babək Həsənovun, Aqil Məhərrəmlinin, daha sonra 2020-ci il Qarabağ yürüşünə görə həbs edilmiş çox sayda fəalın, başda AXCP üzvləri Niyaməddin Əhmədov və Fuad Qəhrəmanlı olmaqla, eləcə də AXCP-nin digər fəalı Əlizamin Salayevin müxətlif dərəcədə fiziki zorakılıqlara, işgəncələrə məruz qalması da bilinən faktlar idi. Nəhayət, cəmi 4 ay qabaq MŞ Koordinasiya Mərkəzinin üzvü Tofiq Yaqublu yenidən polislər tərəfindən çox ağır şəkildə döyülmüşdü. Belə zorakılıq halları təbii ki, bu sadalananlardan da çoxdur. Lakin dünya birliyi hakim rejimin bu qədər insanlıq əleyhinə əməlini görməzdən gəlib, ona lazım olan sərt münasibətini bildirməyib.

İşgəncələrdən əlavə, İlham Əliyevin hakimiyyəti illərində ölkədə fundamental insan hüquqları daim məhdudlaşdırılıb, bütün seçkilər saxtalaşdırılıb, korrupsiya dövlət siyasətinə çevrilib, 2014-cü ildən bəri siyasi məhbusların sayı 100 nəfərdən aşağı düşməyib və bütün bunlara da beynəlxalq təşkilatlar adekvat münasibət göstərməyib.

Milli Şura ölkədə belə bir vəziyyətin yaranmasına görə Azərbaycan cəmiyyətinin daşıdığı məsuliyyəti də xatırlatmağı özünə borc bilir. Cəmiyyət ölkədə avtoritar, korrupsioner bir sistemin möhkəmləndirilməsinə daha mütəşəkkil qaydada müqavimət göstərmədiyi, buna qarşı mübarizəni öndə olan az sayda ictimai-siyasi fəalın öhdəsinə buraxdığı üçün hakim rejim də qəddarlığını, zülmünü artırmaqla həmin kəsimi susdura, sıradan çıxara və öz mütləqiyyətini sonsuza qədər davam etdirə biləcəyini düşünür. Milli Şura inanır ki, Azərbaycan cəmiyyəti bu rejimə öz düşüncəsində necə yanıldığını bir gün nəhayət göstərəcək.

Milli Şura hazırki rejiminin bütün etdiklərinə rəğmən, Azərbaycanın demokratiyaya qovuşması uğrunda apardığı mübarizədən geri çəkilməyəcəyini bir daha bəyan edir və həm beynəlxalq birliyi, həm də Azərbaycan xalqını bu mübarizəyə daha ciddi, daha təsirli və daha güclü şəkildə dəstək verməyə çağırır". -0-